وزیر اعظم عمران خان 2018 کے سینیٹ الیکشن کے  تجربے کی روشنی میں چاہتے تھے کہ ان کے پارٹی ممبران اس بار پیسے لے کر وفاداری نہ تبدیل کر سکیں ۔   لیکن پھر وہی ہوا جس کا اندیشہ تھا۔  عمران خان  سرمائے سے خریدی گئی جمہوریت ختم کرنے کے لئے جتنا زور لگارہے ہیں ۔اپوزیشن اس سے دوگنا زور اس سسٹم کو بچانے کے لئے لگا رہی ہے۔ اس کے لئے ہر طرح کے ہتھکنڈوں کو جائز بھی سمجھا جا تاہے۔ مریم نواز کی جانب سے آئندہ الیکشن  میں مسلم لیگ ن کے ٹکٹس کا وعدہ بھی دراصل ایک قسم کی سیاسی رشوت ہے ۔  پیپلز پارٹی کے رہنماعلی حیدر گیلانی اور  سندھ کے صوبائی وزیرناصر حسین شاہ کی مبینہ ویڈیوز نے   ان الیکشنز کو مشکوک بنا دیا ہے۔  تاہم اس حوالے سے الیکشن کمیشن  کی خاموشی اس کی اپنی کارکردگی کے حوالے سے بڑا سوالیہ نشان بن گئی ہے۔ سابق وزیر اعظم سید یوسف رضاگیلانی  کے لئے جس طرح  سینیٹ الیکشن مینیج کیا گیا۔ اس نے ہماری سیاست میں  اخلاقی اقدار پر کئی سوالات اٹھا دیئے ہیں۔ جس فتح پر اپوزیشن خاص طور پر پیپلزپارٹی نازاں ہے دراصل سیاسی طور پر شرم کا مقام ہے ۔ اپنے مینڈیٹ سے زائد ووٹ حاصل کرنے کے لئے ناجائز ذرائع کا استعمال کیا قابل فخر عمل ہے ؟  

لیکن یہ امر بھی دلچسپی سے خالی نہیں کہ  تحریک انصاف کی فوزیہ ارشد  پورے 174 ووٹ لے کر کامیاب رہیں  اور ان کے مقابلے میں مسلم لیگ ن کی امیدوار  فرزانہ کوثر ہار گئیں۔  ایک ہی وقت میں ہونے والے ان الیکشنز میں  دو مختلف نتائج    میں ہیرا پھیری واضح ہے۔ اندر کی خبر لانے والوں کے مطابق  ووٹوں کی خریدوفروخت صرف مردانہ سیٹ پر ہوئی تھی۔ لگتا ہے کہ زرداری صاحب نے مسلم لیگ ن  کے ساتھ چھوٹا سے ہاتھ کر دیا  ہے۔ ن لیگ والے باامر مجبوری خاموش ہیں۔    اخلاقی اقدار میں گراوٹ کا مسئلہ کسی ایک  سیاسی جماعت کا نہیں ہے۔ اپوزیشن اور حکومت دونوں ہی ایک وزن میں تولنےکے لائق ہیں۔ یوسف رضا گیلانی کی جیت سے اپوزیشن کے خوشی تلپٹ کرنے کے لئے وزیر اعظم عمران خان نے  اعتماد کا ووٹ لینے کا فیصلہ کیا۔ بظاہر یہ کام  انھوں نے  خود کو اخلاقی طور پر بلند دکھانے کے لئے کیا۔  لیکن 6 مارچ کو  انھیں ملنے والے 178 ووٹوں  میں وہ ووٹ  بھی شامل تھے جو 4 مارچ کو یوسف رضاگیلانی کی فتح میں شامل تھے۔ اگر عمران خان صاحب واقعی  بڑا مارل گراؤنڈ  دکھانا چاہتے تھے ۔ تو سب سے پہلے ان  بونوں کو فارغ کرتے جو آئند ہ الیکشن کی ٹکٹوں کے وعدے یا پیسےلے کر بک گئے تھے۔   عمران خان کا مسئلہ یہ ہے کہ وہ ان لوگوں کو ساتھ ملا کر سسٹم بدلنے کے دعوے دار ہیں جو اس کرپٹ نظام کی پیداوار ہیں۔ جن کا ڈی این اے ہی اس خمیر سے بنا ہے ۔ پاکستان میں الیکٹ ایبلز کی یہ کلاس کسی جماعت کی وفادار نہیں۔ ان کی وفاداری اپنے  اقتدار  اور خود کو ملنے والے فائدے سے مشروط ہے ۔   یہ سسٹم جگہ جگہ سے لیک  ہو رہاہے  ۔ فائدہ اٹھانے والی قوتیں جانتی ہیں کہ کہاں پر سوراخ ہیں ۔ اس کے لئے  سرمایہ ، لالچ اور دھونس  سمیت ہر  حربہ استعمال کیا جاتا ہے۔  سپریم کورٹ کے احکامات کی روشنی میں یہ الیکشن کمیشن کے لئے ایک ٹیسٹ کیس تھا ۔ الیکشن کمیشن کی ذمہ داری تھی   کہ وہ سینیٹ کے شفاف  اور غیر جانبدارانہ الیکشن کراتی ۔ الیکشن کمیشن اس میں ناکام رہا ۔  سینیٹ الیکشن میں ووٹ دینے والے لاکھوں کروڑوں عام لوگ نہیں بلکہ ملک کی محدود  الیکٹڈ  سیاسی اشرافیہ تھی۔  اس کے حلقے ملک کی  اسمبلیاں تھیں۔ اس کنٹرولڈ ماحول میں  بھی الیکشن کمیشن  کی ایسی  کارکردگی ؟اس سےقبل ڈسکہ الیکشن  میں بھی الیکشن کمیشن  مکمل طور پر  بے بس نظر  آیا۔  چیف الیکشن کمشنر کی جانب سے دیئے گئے بیان سے لگ رہا ہے  کہ   خود کو غیر جانبدار  اور دباؤ سے باہر  ثابت کرنے کی کوشش کی جارہی ہے۔  حالانکہ  دباؤ صرف اپنی کارکردگی کا ہونا چاہیےتھا۔ حقیقت یہ ہے  کہ الیکشن کمیشن عام انتخابات میں اخراجات  کی حد پر آج تک عمل درآمد نہیں کر سکا۔  اب سینیٹ الیکشن ، عدم اعتماد اور اعتماد کا ووٹ اور لانگ مارچ   جیسے کھیل کے پیچھے  اصل میں اقتدار کی جنگ ہے۔  مسلم لیگ ن اور  پیپلزپارٹی ہر صورت اقتدار   حاصل کرنا چاہتے ہیں ۔  وزیر اعظم عمران خان کو یہ بات سمجھنا ہو گی کہ  اس معرکے میں  انھیں ریلیف صرف عوامی کورٹ سے مل سکتا ہے ۔  ڈیڑھ کروڑ لوگوں نے  عمران خان کو صرف اس لئے ووٹ دیئے تھے  کہ وہ مہنگائی ، بےروزگاری اور عدم تحفظ سے نجات چاہتے تھے۔ ان ڈھائی برسوں میں یہ عدم  تحفظ  کم ہونے کی بجائے بڑھا ہے ۔  نیا پاکستان بیڈ گورننس  اور معاشی بدحالی کا استعارہ  بنتا جا رہا ہے ۔  عمران   خان  صاحب کو ئی انقلابی لیڈر نہیں  کہ لوگ بھوکے پیٹ ان کے احتساب کے نعرے کے پیچھے  چلتے رہیں گے۔ انھیں عوامی مینڈیٹ سماجی انصاف کی فراہمی کے لئے ملا ہے ۔  اپوزیشن جماعتیں جو پہلے دن سے ہی انھیں اٹھا کر باہر پھینکنا چاہتی ہیں ۔ اب تک اس لئے ناکامیاب ہیں  کہ انھیں عوام میں پذیرائی نہیں مل سکی۔ لیکن اگر عوام کو ریلیف نہ ملا تو ہر بار ایسا نہیں ہوگا ۔