کراچی : سولجر بازار میں فائرنگ ، 2 افراد جاں بحق 

جی این این کے مطابق  کراچی کے علاقے سولجر بازار میں موٹر سائیکل سوار ملزمان کی  فائرنگ سے  دو افراد جاں بحق ہوگئے ۔ پولیس جائے وقوعہ پر موجود ، لاشوں کو قانونی کارروائی کیلئے اسپتال منتقل کر دیا گیا ۔

پولیس کے مطابق ابتدائی طور پر واقعہ ذاتی دشمنی کا شاخسانہ لگتا ہے ۔  لیاری کے علاقے چاکیواڑہ کے رہائشی جاوید بلوچ اور محمد مقدس موٹر سائیکل پر جا رہے تھے کہ ان کے تعاقب میں آنے والے 2 موٹر سائیکلوں پر سوار 4 ملزمان نے فائرنگ کی۔

پولیس کی ابتدائی تفتیش کے مطابق واردات میں نائن ایم ایم پستول کا استعمال کیا گیا ہے ، جائے وقوع سے نائن ایم ایم پستول کے 13 خول ملے ہیں ۔

پولیس ذرائع کے مطابق مقتول جاوید بلوچ پولیس کے اسسٹنٹ سب انسپکٹر (اے ایس آئی) تھے۔ مقتول اےایس آئی لیاری گینگ وار اور دیگر کیسز کی تفتیش کررہےتھے۔  پولیس کیجانب سے فائرنگ کے واقعے کا ہر پہلو سے جائزہ لیا جا رہا ہے۔