نیپرا نے بجلی کی قیمت میں اضافے کی منظوری دے دی

تفصیلات کے مطابق نیپرا کی جانب سے جنوری کے ماہانہ  فیول چارجز ایڈجسٹمنٹ کی مد میں 0.8954روپے فی یونٹ اضافے کی منظوری کا نوٹیفکیشن جاری کر دیا گیا ہے جس سےصارفین پر 6 ارب 90 کروڑ روپے کا اضافی بوجھ پڑے گا۔ اس کا اطلاق صرف مارچ  کے مہینے کے بلوں پر ہوگا جبکہ اس کا اطلاق ڈسکوز کے تمام صارفین ماسوائے لائف لائن صارفین پر ہوگا۔

سی پی پی اے نے 0.9270روپے فی یونٹ اضافے کی درخواست کی تھی جبکہ نیپرا اتھارٹی نے 25 فروری  2021 کو ایف سی اے پر عوامی سماعت کی تھی اور فیصلہ محفوظ کر لیا تھا۔

یادرہے کہ 25 فروری کو ہونے والی سماعت میں نیپرا حکام کا کہنا تھا کہ میرٹ آرڈر سے ہٹ کر پاور پلانٹس چلانے سے صارفین پر 3 ارب 90 کروڑ روپے کا اضافی بوجھ پڑا، بجلی کی پیداواری لاگت میں اضافے کی وجہ گیس کی عدم دستیابی تھی، جنوری میں گیس کی بدترین قلت کا سامنا رہا، گیس دستیاب ہوتی تو 9 جنوری کی رات مکمل بلیک آؤٹ نہ ہوتا، جنوری میں پاور پلانٹس کے لئے 450 ایم ایم سی ایف ڈی گیس درکار تھی، 24 جنوری تک 110 سے 154 ایم ایم سی ایٖ ڈی گیس دی گئی، 9 جنوری کو پاور پلانٹس کے لئے گیس کی فراہمی صفر کر دی گئی، گیس نہ ہونے کی وجہ سے فرنس آئل سے مہنگی بجلی پیدا کرنی پڑی۔