فروری کے وسط تک کورونا کیسز میں کمی کا آغاز ہوگا : ڈاکٹر قیصر سجاد 

تفصیلا ت کے مطابق  پاکستان میڈیکل ایسوسی ایشن نے ملک میں کورونا کی صورتحال کے پیش نظر عوام سے ماسک کے استعمال کی اپیل کی ہے۔ سیکریٹری جنرل پی ایم اے ڈاکٹر قیصر سجاد کا کہنا ہے کہ عوام ماسک کا استعمال کریں ، سماجی فاصلہ رکھیں کیونکہ اومی کرون کی صورتحال اگر بگڑ گئی تو بہت مشکل ہو گی۔

ڈاکٹر قیصر سجاد نے کہا کہ میرے خیال میں فروری کے وسط تک کورونا کیسز میں کمی آنا شروع ہو جائے گی ۔ عوام سے کہتا ہوں  کہ صورتحال معمول کے مطابق ہی رہے تو احتیاط کریں ۔

واضح  رہے کہ پاکستان  میں کورونا کی پانچویں لہر شدت اختیار کرگئی  ہے اور    گزشتہ 24 گھنٹوں کے دوران 30 افراد انتقال کرگئے جس کے بعد اموات کی مجموعی تعداد 29ہزار 192 ہوگئی ہے ۔ملک میں  کوروناایکٹو کیسز کی تعداد98ہزار221ہوگئی ۔ 

نیشنل کمانڈ اینڈ آپریشن سینٹر کی جانب سے جاری کیے گئے تازہ اعداد و شمارکے مطابق  ملک میں کورونا وائرس کے کُل مریضوں کی تعداد 14 لاکھ 02ہزار070ہو چکی ہے۔این سی اوسی کے مطابق ملک میں کوروناکےمثبت کیسزکی شرح11.92فیصدرہی ، جبکہ 1353مریضوں کی حالت تشویشناک ہے ۔

ملک میں گزشتہ24گھنٹوں میں کوروناکے68ہزار624ٹیسٹ کئےگئے ہیں ۔ گزشتہ24گھنٹوں میں1786افرادکوروناسےصحت یاب ہوئے   جبکہ  اب تک12لاکھ74ہزار657مریض کورونا سےشفایاب ہوچکے ہیں ۔

خیال رہے کہ پاکستان میں کورونا وائرس کا پہلا کیس 26 فروری 2020 کو ملک کے سب سے بڑے شہر کراچی میں سامنے آیا تھا۔