چیف جسٹس پاکستان گلزار احمدآج ریٹائرہوجائیں گے

چیف جسٹس گلزاراحمدنے 2 سال 2 ماہ 10 دن تک  چیف جسٹس پاکستان کےعہدے پر فرائض انجام دیے ۔ وہ 2002 میں سندھ ہائی کورٹ کے جج مقررہوئے جبکہ 2007 میں پی سی او پرحلف نہ لینے کے باعث انہیں معطل بھی کیا گیا۔ چیف جسٹس گلزار احمد2011 میں بحال ہوئے جس کے بعد سپریم کورٹ میں بطورجج ان کی تعیناتی ہوئی تھی ۔ 

2 فروری 1957 کو کراچی میں پیدا ہونے والے جسٹس گلزار احمد نے ابتدائی اور اعلیٰ تعلیم بھی اسی شہر میں حاصل کی۔

نومبر 2011 میں جب جسٹس گلزار احمد کو سندھ ہائیکورٹ سے سپریم کورٹ کا جج مقرر کیا گیا تو اُس وقت افتخار محمد چودھری پاکستان کے چیف جسٹس تھے۔؎

چیف جسٹس گلزار احمد نے کورونا وائرس کے پھیلاؤ کے دوران حکومتی اقدامات پر ازخود نوٹس بھی لیا۔

چیف جسٹس گلزار احمد کا دور سندھ کی صوبائی حکومت سے متعلق مختلف مقدمات میں سخت آبزرویشن کے لیے بھی یاد رکھا جائے گا۔

جسٹس گلزار احمد نے کئی اہم مقدمات کے فیصلے دیے جن میں سے 20 اپریل 2017 کو پانامہ پیپرز کیس میں نواز شریف کے خلاف درخواستوں پر پہلا فیصلہ بھی شامل ہے۔

سابق وزیراعظم نواز شریف کے خلاف عمران خان اور دیگر کی درخواستوں پر انہوں نے ابتدائی مرحلے میں ہی جسٹس آصف سعید کھوسہ کے ہمراہ نااہلی کا حکم سنایا تھا جبکہ دیگر تین ججز ن معاملہ مشترکہ تحقیقاتی کمیٹی (جے آئی ٹی) کو بھجوا دیا تھا۔

ان کے دور میں پاکستان کی سپریم کورٹ میں پہلی بار خاتون جج جسٹس عائشہ ملک کا تقرر کیا گیا جسے ایک تاریخی اقدام کے طور پر یاد رکھا جائے گا ۔