بھارت میں کشمیری مسلمان طلبہ کی قابلیت جرم بن گئی،مقبوضہ کشمیر میں میڈیکل انسٹی ٹیوٹ بند کر دیا گیا

سری نگر: بھارت میں کشمیری مسلمان طلبہ کی تعلیمی قابلیت کو ان کا “جرم” قرار دیتے ہوئے شری ماتا ویشنو دیوی میڈیکل انسٹیٹیوٹ بند کر دیا گیا ہے۔ 

میڈیکل کالج کی بندش کی وجہ دائیں بازو کے ہندو گروپس کا مسلمانوں کے داخلے پر احتجاج بتایا گیا ہے، جسے الجزیرہ نے رپورٹ کیا ہے۔

رپورٹس کے مطابق ہندو انتہا پسند گروپس اور بی جے پی کے رہنماؤں نے مسلمان طلبہ کے داخلے کو “نامناسب” قرار دیا اور احتجاج کیا کہ ہندو عطیات سے چلنے والے ادارے میں مسلمانوں کو داخلہ نہیں ملنا چاہیے۔ نیشنل میڈیکل کمیشن نے کالج کی منظوری انفراسٹرکچر کی کمی کا جواز دے کر واپس لے لی۔

بھارتی میڈیا رپورٹس کے مطابق نیشنل میڈیکل کمیشن (این ایم سی) جو طبی تعلیم اور پیشہ ورانہ امور کا وفاقی ریگولیٹری ادارہ ہے نے 6 جنوری کو شری ماتا ویشنو دیوی میڈیکل انسٹی ٹیوٹ (ایس ایم وی ڈی ایم آئی) کی منظوری واپس لے لی۔

یہ ادارہ ضلع ریاسی میں واقع ہے جو ہمالیہ کے پیر پنجال پہاڑی سلسلے کے قریب واقع ہے، جو جموں کے میدانی علاقوں کو وادی کشمیر سے جدا کرتا ہے۔

رپورٹ کے مطابق نومبر میں ایم بی بی ایس کے پانچ سالہ پروگرام میں داخلہ لینے والے 50 طلبہ میں سے 42 مسلمان تھے، جن کی اکثریت کا تعلق کشمیر سے تھا جبکہ سات ہندو اور ایک سکھ طالب علم شامل تھا۔ مسلم طلبہ کی نمایاں اکثریت پر دائیں بازو کی ہندو تنظیموں نے شدید احتجاج کیا، جس کے بعد کالج کے خلاف کارروائی عمل میں لائی گئی۔

یہ واقعہ بھارت میں تعلیم کے شعبے میں مذہب اور سیاست کے بڑھتے اثر و رسوخ پر سنگین سوالات اٹھا رہا ہے اور طلبہ کی تعلیم کے حق پر نئی بحث کو جنم دے رہا ہے۔

دوسری جانب انسانی حقوق کے حلقوں نے اس فیصلے پر تشویش کا اظہار کرتے ہوئے اسے امتیازی اور مذہبی بنیادوں پر کیا گیا اقدام قرار دیا ہے۔ واقعے نے ایک بار پھر بھارتی زیرانتظام کشمیر میں مسلمانوں کو درپیش تعلیمی اور سماجی مشکلات کو اجاگر کر دیا ہے۔