وزیراعظم شہباز شریف نے اسلام آباد میں پاکستان آسان خدمت مرکز کا افتتاح کردیا

اسلام آباد:وزیراعظم شہباز شریف نے وفاقی دارالحکومت اسلام آباد میں مقیم لوگوں کی سہولت کے لئے پاکستان آسان خدمت مرکز کا افتتاح کیا۔

اس موقع پر منعقدہ افتتاحی تقریب سے خطاب کرتے ہوئےوزیر اعظم شہباز شریف نے کہا کہ یہ مرکز عوام کو سہولت فراہم کرنے کے لیے ایک شاندار اقدام ہے اور یہاں کے اسٹاف کی خوش اخلاقی، احترام اور خدمت کی اعلیٰ خصوصیات شہریوں کے لیے ایک مثبت تجربہ ثابت ہوں گی۔

تقریب سے خطاب کرتے ہوئے انہوں نے اس مرکز کے قیام میں تعاون فراہم کرنے پر آذربائیجان کے صدر الہام علیوف کا شکریہ ادا کیا،انہوں نے اپنے دورہ باکو کا ذکر کرتے ہوئے کہا کہ وہ آذربائیجان کی حکومت کی اپنی عوام کیلئے پیش کردہ خدمات سے بے حد متاثر ہیں۔

وزیر اعظم نے افتتاحی تقریب میں کہا کہ ایف پی آر اور دیگر متعلقہ ادارے اس مرکز میں خدمات فراہم کریں گے، جس سے عوام کے لیے سہولت میں بے پناہ اضافہ ہوگا، انہوں نے سٹاف ممبرز کی تربیت کی تعریف کرتے ہوئے کہا کہ ماسٹرز ٹرینرز کی زیر نگرانی یہ ٹیم نہ صرف وطن میں بلکہ بین الاقوامی سطح پر تربیت حاصل کر چکی ہے، اور ان کی خوش اخلاقی اور احترام عوام کی خدمت کے لیے انتہائی اہم کردار ادا کرے گا۔

انہوں نے مزید کہا کہ اس مرکز کی خدمات سے یہاں آنے والے پاکستانی بھائی بہن اور نوجوان نہ صرف فائدہ اٹھائیں گے بلکہ سٹاف کی محنت اور مسکراتے ہوئے چہروں کو بھی دل سے سراہیں گے۔

انہوں نے کہا کہ اس مرکز میں نادرا، دفتر خارجہ، پولیس اور دیگر ادارے کام کریں گے اور عوام کو خدمات فراہم کریں گے،وزیراعظم نے کہا کہ پاکستان آسان خدمت مرکز کے دائرہ کار کو مظفرآباد اور گلگت بلتستان تک توسیع دی جائے گی۔

وزیراعظم نے کہا کہ میں سب کا شکریہ ادا کرتا ہوں اور یہاں کی مینجمنٹ کو دل کی گہرائیوں سے مبارکباد پیش کرتا ہوں، میں گزارش کرتا ہوں کہ آپ کی بہترین کارکردگی اور خوش اخلاقی سے یہاں آنے والے صارفین متاثر ہوں اور مزید لوگ اس سہولت سے مستفید ہونے کے لیے آئیں، تاکہ یہ ادارہ جس مقصد کے لیے بنایا گیا اور جس سرمایہ سے قائم ہوا، وہ بھرپور طریقے سے عوام تک پہنچ سکے۔ آپ کی خدمت، مسکراہٹ اور الرٹس نہ صرف دین میں بلکہ دنیا میں بھی آپ کے لیے اجر کا باعث بنیں گی۔