پی ایس ایل سکس کے میچز جون میں کراچی میں کروانے کا فیصلہ

تفصیلات کے مطابق  پاکستان سپر لیگ 6 کے بقیہ میچز کے معاملے پر پی ایس ایل انتظامیہ اور ٹیم مالکان کا اجلا س ہوا۔پی سی بی حکام اور فرنچائز مالکان جون میں میچز کروانے پر متفق ہوگئے۔پاکستان سپر لیگ 6 کے بقیہ میچز جون میں کراچی میں کروائے جائیں گے۔

گزشتہ ہفتے   پی سی بی اور ٹیموں کے مالکان کے درمیان منعقدہ ورچوئل میٹنگ کے بعد پاکستان کرکٹ بورڈ نے ایچ بی ایل پاکستان سپر لیگ 6 کو فوری طور پر ملتوی کرنے کا اعلان کیا تھا۔ پی ایس ایل ملتوی کرنے کا فیصلہ  کورونا کیسز سامنے آنے کے بعد کیا گیا تھا۔

پاکستان سپر لیگ ملتوی ہونے پر قومی کرکٹ ٹیم کے سابق فاسٹ باؤلر شعیب اختر برہم ہو گئے تھے۔ ان کا کہنا تھا جنہوں نے کبھی ٹیپ بال کرکٹ نہیں کرائی وہ پی ایس ایل کروا رہے ہیں۔ میڈیکل پینل کی ذمہ داری تھی کہ بائیو ببل کو محفوظ بناتے، جو اس میں ذمہ دار ہیں ان کے خلاف سخت انکوائری عمل میں لائی جائے۔ اس معاملے کی معزز لوگ تحقیقات کریں اور اسے بورڈ نہیں بلکہ حکومتی سطح پر دیکھا جائے۔

پاکستان سپر لیگ (پی ایس ایل )6 ملتوی ہونے کے معاملے پر پاکستان کرکٹ بورڈ(پی سی بی ) نے تحقیقات کے لیے آزاد انکوئری کمیشن بنانے کا فیصلہ کیا تھا۔ آزاد انکوائری کمیشن تحقیقات مکمل کرکے ایک ماہ کے اندر رپورٹ جمع کروانے کا پابند  ہوگا۔انکوائری کمیشن کو پی ایس ایل میں کورونا وائرس داخل ہونے کی وجوہات سامنے لانے کا ٹاسک دیا گیا ہے۔کمیشن کی سفارشات کی روشنی میں ذمہ داروں کے خلاف کارروائی کی جائے گی۔