وزیراعلیٰ سردار عثمان بزدار سے چینی سفیر کی ملاقات، مختلف شعبوں میں تعاون بڑھانے پر تبادلہ خیال

تفصیلات کے مطابق لاہور میں وزیر اعلی پنجاب عثمان بزدار اور چینی سفیر  نونگ رونگ کے مابین ملاقات ہوئی جس میں چین کے سفیر  کی جانب سے  وزیراعلیٰ پنجاب سردار عثمان بزدار کو چین کے دورے کی دعوت دی گئی ہے۔

ملاقات میں صنعت،زراعت اور ٹیکنیکل ٹریننگ کے شعبوں میں معاونت مزید بڑھانے پر اتفاق کیا گیا اور چین کے سفیرنے کورونا وباء پر قابو پانے کے لئے وزیراعلیٰ کی قیادت میں پنجاب حکومت کے موثر اقدامات کو سراہا۔

وزیراعلیٰ عثمان بزدار نے ویکسینیشن کی فراہمی پر چین کی حکومت او رعوام کا شکریہ ادا کیا ہے۔

وزیراعلیٰ عثمان بزدار  نے مزید کہا کہ چین پاکستان کا انتہائی بااعتماد دوست ملک ہے, پاکستان کی تعمیر و ترقی میں چین کے تعاون کو قدر کی نگاہ سے دیکھتے ہیں۔وزیراعظم عمران خان کے دور میں پاک چین معاشی تعلقات نئی بلندیوں کو چھو رہے ہیں, سی پیک کے منصوبے پاکستان کی پائیدار ترقی کے سفر میں اہمیت کے حامل ہیں, پنجاب میں سرمایہ کاری کیلئے انتہائی سازگار ماحول ہے،چینی کمپنیاں سپیشل اکنامک زونز میں سرمایہ کاری کریں،ہر طرح کی مراعات اور سہولتیں دیں گے۔

چینی سفیرنونگ رونگ کا کہنا تھا کہ سپیشل اکنامک زونز میں سرمایہ کاری کے مواقع سے فائدہ اٹھائیں گے، سماجی شعبوں کی ترقی کیلئے پنجاب حکومت کے ساتھ تعاون کو مزید بڑھانا چاہتے ہیں، چین ترقی وخوشحالی کے سفر میں پاکستان کے ساتھ ہے۔

عثمان بزدار نے چین کی خوبیوں کا زکر کرتے ہوئے کہا کہ غربت اور کرپشن کے خاتمے کیلئے چین نے گراں قدر کام کیاہے جسے پوری دنیا سراہتی ہے ۔