وسیم اکرم نے پی سی بی کی کرکٹ کمیٹی پر سوال اُٹھا دیا

تفصیلات کے مطابق  قومی ٹیم کے سابق کپتان  اور کرکٹ کمیٹی کے رکن وسیم اکرم نے اپنی ہی کمیٹی پر انگلی اُٹھادی ۔ اس حوالے سے  ان  کاکہناتھا کہ کونسی کرکٹ کمیٹی؟جس کا سال میں ایک  ہی اجلاس ہوتا ہے ۔

وسیم اکرم نے میڈیاسے گفتگو کرتے ہوئے کہاکہ  دورہ جنوبی افریقہ بہت  اہم ہے،  وہاں کی وکٹیں بہت مختلف ہونگی ، پاکستان کو دورہ جنوبی افریقا میں مشکلات کاسامنا کرناپڑ سکتاہے۔ سلیکشن کے حوالے سے کافی باتیں سنی ہیں ۔ ان کاکہنا تھا کہ   ہمارے یہاں کھلاڑیوں کی سلیکشن کو مسئلہ بنا دیا جاتا ہے ، جو کھلاڑی اسکواڈ میں شامل ہو اس کا ایشو نہیں جو نہ ہو اسے مسئلہ بنا دیا جاتا ہے ، شرجیل خان  کافی وقت سے بائیو سیکیور ببل میں تھے،اس  نے وعدہ کیا ہے وہ اپنی فٹنس پر کام کرے گا،شرجیل خان کو اپنی فٹنس عالمی معیار کے مطابق کرنی ہوگی ۔

وسیم اکرم   کاکہنا تھا کہ کرکٹ بورڈ میں ہوں اورنہ ٹیم میں،کسی کے کام میں مداخلت نہیں کرتا ، اگر باہر رہ کر بھی میرا اثرورسوخ ہے  تو مجھے شاباش ہے۔ انہوں نے کہا کہ اتنا وقت نہیں کہ ٹیم سلیکشن کیلئے  چیف سلیکٹر کو فون کروں  ، ایسی خبریں پھیلانے والے فارغ لوگ ہیں ۔  محمد وسیم کو پی سی بی نے چیف سلیکٹر بنایا ،  محمد وسیم کا کام قومی اسکواڈ کی سلیکشن کرنا ہے،کپتان اورچیف سلیکٹر میں اختلافات معمول کی بات ہے ۔