کورونا کی تیسری لہر میں تیزی، گوجرانوالہ میں مثبت کیسز میں اضافہ

تفصیلات کے مطابق صوبہ پنجاب کے شہر گوجرانوالہ میں عالمی وبا کورونا وائرس کے مریضوں میں اضافے کے بعد 20 علاقوں میں اسمارٹ لاک ڈاؤن  نافذ کیا گیا ہے ، محکمہ صحت کے مطابق گوجرانوالہ میں کورونا کے مجموعی کیسز کی تعداد872  تک جاپہنچی ہے ۔

ضلعی انتظامیہ کے مطابق گوجرانوالہ شہر کی تمام بڑی مارکٹیں آج بند رہیں گی ، سیٹلائٹ ٹاون،پیپلز کالونی،ماڈل ٹاون مارکیٹ بھی بند رہے گی ۔ جبکہ اندرون شہر ،سید نگری بازار،ریل بازار ،صرافہ مارکیٹ بھی مکمل بند رہے گی۔جی ٹی روڈ پر سینٹری شاپ ، کار اور موٹر سائیکل شو روم سمیت موبائل مارکیٹ بھی آج بند رہے گی ۔تاہم  گوشت،چکن شاپ ،دودھ دہی شاپ ، کریانہ اور میڈیکل سٹور کھلے رہیں گے ۔ ڈپٹی کمشنر سہیل خواجہ کا کہنا ہے کہ ضلعی انتظامیہ کی ٹیمیں متحرک ہے جو تاجر قانون کی خلاف ورزی کرے گا اس کے خلاف کاروائی کی جائے گی ۔

دوسری جانب پنجاب کے کئی شہروں میں کورونا وائرس سے بچاؤ کی حفاظتی تدابیر (ایس او پیز) کی خلاف ورزی پر کئی دکانیں اور شادی ہالز سیل کردیے گئے۔کورونا وائرس کے ایس او پیز میں ماسک پہنیں، ہاتھ سینیٹائز کریں اور فاصلہ برقرار رکھیں کے اصولوں کی خلاف ورزی پر مختلف شہروں کی انتظامیہ حرکت میں آگئی ہے ۔

واضح رہے کہ ملک بھرمیں ایک بار پھر  کورونا کیسزاور اموات  میں  تیزی سے اضافہ ہونے لگا ہے ، پنجاب میں کورونا مریضوں کی تعداد ایک لاکھ95ہزار 087ہوگئی ۔ جبکہ صوبے میں اب تک 5 ہزار944 افراد جان سے ہاتھ دھو بیٹھے ہیں ۔نیشنل کمانڈ اینڈ آپریشن سینٹر کی جانب سے جاری کیے گئے تازہ اعداد و شمارکے مطابق گزشتہ 24 گھنٹوں میں کورونا سے مزید42  افراد چل بسے جس کے بعد اموات کی مجموعی تعداد 13 ہزار799ہوگئی ہےجبکہ ملک میں کورونا کے فعال کیسز کی تعداد 29 ہزار 576 ہے ، اب تک کورونا کے  6 لاکھ 23ہزار 135کیسز رپورٹ ہوچکے ہیں ۔