اٹلی نے پاکستان کو سال2022 کیلئے سیزنل ورک ویزا کی لسٹ میں شامل کردیا

اٹلی نے پاکستان کو سال 2022 کیلئے سیزنل ورک ویزا کی لسٹ میں شامل کردیا، اٹلی میں پاکستانی سفیر جوہرسلیم کا کہنا ہے کہ سیزنل ورک ویزا پاکستانی لیبرفورس کیلئے بہت بڑی خوشخبری ہے، پاکستان نے لیبرمعاہدے کا مسودہ اطالوی حکومت کے حوالے کردیا ہے، پاکستان نے 372 ملین ڈالر کا تجارتی سرپلس ریکارڈ کیا، اٹلی میں چاول کی مجموعی مارکیٹ میں پاکستان کا حصہ 38 فیصد ہے۔ 

تفصیلات کے مطابق اطالوی حکومت نے پاکستان کو سال 2022 کیلئے سیزنل ورک ویزا کی لسٹ میں شامل کردیا۔ سیزنل ورک ویزا پاکستانی لیبر فورس کے لئے بہت بڑی خوشخبری ہے، پاکستان نے لیبر معاہدے کا مسودہ اطالوی حکومت کے حوالے کردیا  ہے۔ جوہر سلیم کا کہنا ہے کہ مالی سال 2021-22 میں عالمی وبا کے باوجود پاکستان کی اٹلی کو برآمدات میں41 فیصد اضافہ ہوا، پاکستان کی برآمدات 9 ماہ میں 805 ملین ڈالر رہی جو تاریخ کی بلند ترین سطح پر ہے، پچھلے مالی سال کے مقابلے میں پاکستان کے تجارتی سرپلس میں65 فیصد اضافہ ہوا۔ 

پاکستانی سفیر نے مزید کہا کہ پاکستان نے 372 ملین ڈالر کا تجارتی سرپلس ریکارڈ کیا۔ جوہر سلیم کا کہنا ہے کہ مالی سال 2021،22 میں پاکستانی ورکرز نے639 ملین ڈالر بطور ترسیلات زر بھیجے، اٹلی سے پاکستان کو ترسیلات زر میں گزشتہ مالی سال کے مقابلے میں48 فیصد اضافہ ہوا۔ پاکستانی سفیر جوہر سلیم نے کہا کہ اٹلی میں پاکستانی باسمتی کو زیادہ پسند کیا گیا، اٹلی میں چاول کی مجموعی مارکیٹ میں پاکستان کا حصہ38 فیصد اوربھارت کا صرف 12 فیصد رہا۔ 

 دوسری جانب ٹیلی مواصلات، کمپیوٹر اورانفارمیشن خدمات کی تجارت میں جاری مالی سال کی پہلی تین سہ ماہیوں میں گزشتہ مالی سال کے مقابلہ میں نمایاں اضافہ ریکارڈ کیا گیا ہے، جاری مالی سال کے پہلے 9 ماہ میں ٹیلی مواصلات، کمپوٹر اورانفارمیشن خدمات کی برآمدات میں 29.26 فیصد اوردرآمدات میں 24.93 فیصدکی نموریکارڈکی گئی ہے۔ سٹیٹ بینک کی جانب سے اس حوالہ سے جاری کردہ اعدادوشمارکے مطابق جاری مالی سال کی پہلی تین سہ ماہیوں میں ٹیلی مواصلات، کمپیوٹر اورانفارمیشن خدمات کی برآمدات سے ملک کو1.948 ارب ڈالرکازرمبادلہ حاصل ہواجوگزشتہ مالی سال کی اسی مدت کے مقابلہ میں 29.26 فیصدزیادہ ہے، گزشتہ مالی سال کی اسی مدت میں ٹیلی مواصلات، کمپیوٹر اورانفارمیشن خدمات کی برآمدات کاحجم 1.507 ارب ڈالر ریکارڈ کیا گیا تھا۔ 

مارچ 2022 میں ٹیلی مواصلات، کمپیوٹر اور انفارمیشن خدمات کی برآمدات سے ملک کو259 ملین ڈالرکازرمبادلہ حاصل ہوا جو گزشتہ سال مارچ میں 209 ملین ڈالر اوررواں سال فروری میں 201 ملین ڈالرتھا۔