منی لانڈرنگ کیس : مونس الہی ایف آئی اے میں پیش 

تفصیلات کے مطابق وفاقی تحقیقاتی ادارے (ایف آئی اے) لاہور  نے اسپیکر پنجاب اسمبلی چوہدری پرویز الٰہی کے بیٹے اور سابق وفاقی وزیر مونس الٰہی کے خلاف منی لانڈرنگ کا مقدمہ درج کیا تھا،  اسی  سلسلے  میں وہ گزشتہ روز رات کو ایف آئی اے کے دفتر پہنچے تاہم ایف آئی اے حکام  نے انہیں جمعرات کی صبح پیش ہونے کی ہدایت کی۔

مونس الٰہی کو صبح ساڑھے 8 بجے طلب کیا گیا تھا جس پر وہ مقررہ وقت پر ایف آئی اے کے دفتر پہنچے۔

ایف آئی اے کی جانب سے مونس الہیٰ کے خلاف درج ایف آئی آر میں کہا گیا ہے کہ اُن کے خلاف منی لانڈرنگ ایکٹ کے تحت کارروائی کا آغاز 2 سال قبل ہوا ۔

ایف آئی آر کے مطابق مونس الہیٰ کے خلاف شوگر کمیشن نے منی لانڈرنگ کا انکشاف کیا تھا، مقدمہ ایف آئی اے اینٹی کرپشن سرکل کی رپورٹ پر درج کیا گیا تھا۔

مونس الہیٰ کے علاوہ نواز بھٹی اور مظہر اقبال کے خلاف بھی منی لانڈرنگ کا مقدمہ درج کیا گیا ہے ۔ مونس الہیٰ اور دیگر کے خلاف 720 مِلین روپے کی منی لانڈرنگ کا مقدمہ درج ہے۔