ملک بھر میں مہنگائی کی شرح میں اضافہ

تفصیلات کے مطابق ادارہ شماریات کی طرف سے جاری کیے گئے اعداد و شمار کے مطابق   ایک ہفتےکے دوران آٹا، چینی، دالیں، گھی، ٹماٹر، چکن سمیت 22 اشیا مہنگی ہوئیں ، 7 اشیا کی قیمتوں میں کمی  آئی ہے   جبکہ 22میں استحکام رہا۔ ہفتہ وار رپورٹ میں کہا گیا ہے کہ چکن، ٹماٹر، آٹا، گھی، چینی، دالیں، بریڈ، دودھ کی قیمتوں میں اضافہ ہواہے ،   ایک ہفتے کے دوران چکن 21 روپے فی کلو مہنگا ہوا اور اوسط قیمت 259 روپے86 پیسے پر پہنچ گئی جبکہ چینی 60 پیسے فی کلو مہنگی، مارکیٹ میں اوسط قیمت 99  روپے  تک پہنچ گئی۔ 20 کلو گندم کا آٹا 10 روپے مہنگا ہوا جس کے بعد  دام 968 تک پہنچ گئے۔گھی 2 روپے 88 پیسے فی کلو ، دال مسور ایک روپے فی کلو اور انڈے 61 پیسے فی درجن مہنگے ہوئے۔

ادارہ شماریات  کے مطابق ٹماٹر  8 روپے کلو مہنگے، قیمت 47 روپے ہوگئی،کیلا ایک روپے 49 پیسے، دہی 28 پیسے فی کلو مہنگا ہوا۔ ایک ہفتے میں لہسن کے نرخوں میں 17 روپے کلو کمی، ریٹ 187 پر آگیا، ، پیاز 8روپے 81 پیسے اور آلو 79 پیسے فی کلو سستے ہوئے ۔ حالیہ ہفتے دال چنا، تازہ دودھ، چاول، مٹن اور بیف کی قیمت میں بھی اضافہ ہوا ہے ۔