بنگلہ دیش :مودی کے دورے کیخلاف احتجاجی مظاہرے شدت اختیار کرگئے ، 4افراد ہلاک

عالمی خبر رساں ایجنسی کے مطابق  ڈھاکا سمیت کئی شہروں میں ہونے والے احتجاج میں ہزاروں افراد نے شرکت کی ۔ بنگلہ دیش میں وزیر اعظم مودی مخالف احتجاج گزشتہ ہفتے شروع ہوا تھا جب ڈھاکہ یونیورسٹی کے طلبہ سمیت ہزاروں افراد نے مظاہرے میں شرکت کی تھی۔ مظاہروں میں  طلبہ سمیت ہزاروں شہریوں کے شدید احتجاج پر پولیس کی جانب سے مظاہرین پر آنسو گیس کے شیل پھینکے اور واٹر کین کا استعمال کیا ۔ جواب میں نوجوانوں نے پولیس پر پتھراؤ کیا۔ مظاہروں میں مزید شدت اس وقت آئی جب 4افراد جان کی بازی ہار گئے اور درجنوں زخمی ہوئے۔  

مظاہروں میں شہریوں نے قاتل مودی واپس بھارت جاؤ کے نعرے لگائے۔  مظاہرین نے گجرات میں مسلم کش فسادات میں مودی کے مرکزی کردار پر شدید نعرے بازی کی، مظاہرین نے ’’مودی ۔۔۔ گجرات کا قصاب‘‘ اور ’’ مودی واپس جاؤ‘‘ کے بینرز اُٹھا رکھے تھے۔ مظاہرین آزادی کی گولڈن جوبلی تقریب میں مودی کو دعوت دینے پر شیخ حسینہ کی حکومت سے بھی کافی نالاں ہیں۔

خیال  رہے کہ بنگلہ دیش میں پرتشدد مظاہرے ایک ایسے وقت میں ہو رہے ہیں جب ملک  اس برس اپنی آزادی کی پچاسویں سالگرہ منا رہا ہے، جس کے لیے بہت سی اہم تقریبات کا اہتمام کیا جا رہا ہے۔ نریندر مودی 26 مارچ جمعے کو اسی تقریب میں شرکت کے لیے دو روزہ بنگلہ دیش کے دورے پر ڈھاکا میں موجود ہیں ۔ کورونا وباء کے بعد سے مودی کا کسی بھی بیرونی ملک کا یہ پہلا دورہ ہے۔