مون سون بارشیں : این ڈی ایم اے کی متعلقہ اداروں کو چوکس رہنے کی ہدایت

تفصیلات کے مطابق این ڈی ایم اے نے ایک بیان میں متعلقہ اداروں کوخاص طورپر ہدایت کی ہے کہ وہ نالوں اور آبی گزرگاہوں کی موثر نگرانی کے دوران انتہائی چوکس رہیں تاکہ ممکنہ سیلابی صورتحال سے بچا جا سکے ۔

این ڈی ایم اے نے متعلقہ اداروں سے کہا ہے کہ وہ ان خطرے والے علاقوں میں ضروری مشینری کی بروقت منتقلی اورہنگامی خدمات انجام دینے والے اہلکاروں کی دستیابی یقینی بنائیں اور نشیبی علاقوں میں رہنے والی آبادی کو محتاط رہنے کیلئے پیشگی انتباہ جاری کریں۔

واضح رہے کہ ملک کے بیشتر علاقوں  میں مون سون بارشوں کا سلسلہ جاری ہے ۔ خاص طور پر بلوچستان میں بارشوں سے بھاری جانی و مالی نقصان ہوا ہے ۔  کوئٹہ سمیت بلوچستان کے بیشتر اضلاع میں مزید طوفانی بارشوں کی پیشگوئی ہے۔  پی ڈی ایم اے کی جانب سے  جاری   مراسلے میں 7 جولائی تک شدید بارشوں کی پیشگوئی کی گئی ہے۔

مراسلے میں کہا گیا ہے کہ کوئٹہ، ژوب، زیارت، بارکھان، لورالائی کوہلو میں شدید بارشیں ہوں گی، جبکہ کوئٹہ، پہاڑی اور شہری علاقوں میں سیلابی صورتحال پیدا ہوسکتی ہے۔