مقبوضہ کشمیر میں علماء و مساجد کی پروفائلنگ مذہبی معاملات میں کھلی مداخلت اور منظم ہراسانی ہے،دفتر خارجہ

اسلام آباد: پاکستان نےبھارت کے زیر انتظام مقبوضہ جموں و کشمیر میںعلماءو مساجد اور انتظامی کمیٹیوں کی پروفائلنگ کی شدید مذمت کی ہے۔

تفصیلات کے مطابق وزارت خارجہ کی جانب سے جاری بیان میں کہا گیا ہے کہ بھارتی اقدام مذہبی امور میں کھلی مداخلت ہے جو مذہبی آزادی اور عقیدے کے بنیادی حق کی سنگین خلاف ورزی کے مترادف ہے، اس کا مقصد مقبوضہ علاقے کی مسلم آبادی کو خوفزدہ کرنا اور انہیں تنہائی میں دھکیلنا ہے۔

ترجمان دفتر خارجہ نے کہا کہ مساجد کی پروفائلنگ مذہبی معاملات میں کھلی مداخلت اور مذہبی آزادی کے بنیادی حقوق کی سنگین خلاف ورزی ہے، ان کا کہنا تھا کہ بھارتی اقدامات کا مقصد نمازیوں میں خوف پیدا کرنا اور مذہبی فرائض کی ادائیگی میں رکاوٹ ڈالنا ہے۔

طاہر اندرابی نے مزید کہا کہ کشمیری مسلمانوں کو ہراساں کرنے اور دیوار سے لگانے کی ایک اور جبری کوشش کی جا رہی ہے، اور مذہبی شخصیات کی تصاویر اور مسلکی تفصیلات کا جبری حصول منظم ہراسانی کے زمرے میں آتا ہے۔

ترجمان دفتر خارجہ نے کہا کہ مساجد اور علمائے کرام کو نشانہ بنانا مودی حکومت کی ہندوتوا نظریے پر مبنی ادارہ جاتی اسلاموفوبیا کا شاخسانہ ہے اور بھارتی پالیسیاں واضح طور پر امتیازی اور فرقہ وارانہ نوعیت کی ہیں۔

 طاہر اندرابی نے مزید کہا کہ کشمیری عوام کو کسی بھی خوف یا دباؤ کے بغیر اپنی مذہبی شناخت برقرار رکھنے کا مکمل حق حاصل ہے اور پاکستان مذہبی ظلم و ستم کے خلاف ہر فورم پر کشمیریوں کے ساتھ کھڑا رہے گا۔