پاکستان نے اقوام متحدہ کی کمیٹی میں بھارت کا بے بنیاد پروپیگنڈا مسترد کردیا

ترجمان دفتر خارجہ کا کہنا ہے کہ ممبئی میں اجلاس میں پاکستان مخالف بے بنیاد پروپیگنڈا کیا گیا، بھارت کا اقوام متحدہ کی اہم کمیٹی کا غلط استعمال کرنا افسوسناک ہے، بھارت نے عالمی برادری کو پاکستان کے کردار کے بارے میں گمراہ کیا۔

عاصم افتخار نے مزید کہا کہ بھارت کی ہتک آمیز حرکتیں اقوام متحدہ کی کمیٹی کے مینڈیٹ کو نقصان پہنچاتی ہیں جو قابل مذمت ہیں، بھارت نے جان بوجھ کر ممبئی حملہ کیس کی عدالتی کارروائی کو روک رکھا ہے۔

ترجمان کا اپنے بیان میں مزید کہنا ہے کہ بھارت صرف پاکستان کو بدنام کرنے کیلئے بین الاقوامی فورمز پر سیاست کرتا ہے، بھارت اپنی اور دوسرے ممالک کی سرزمین پاکستان مخالف استعمال کررہا ہے۔

انہوں نے بتایا کہ بھارتی جاسوس کلبھوشن یادیو پاکستان کے اندر تخریب کاری میں ملوث تھا، کلبھوشن کی دہشتگرد سرگرمیاں بھارت کے ملوث ہونے کا زندہ ثبوت ہیں، ٹی ٹی پی اور دیگر دہشت گرد تنظیموں کے ساتھ بھی بھارت کا تعاون مشہور ہے۔