ڈیرہ اسماعیل خان: پولیس پارٹی پر دہشتگرد حملہ، ایس ایچ او سمیت 4 اہلکار شہید

ڈیرہ اسماعیل خان میں پولیس اور محکمہ انسداد دہشت گردی (سی ٹی ڈی) کی سرچ آپریشن کرنے والی پارٹی پر دہشت گردوں نے حملہ کردیاجس کے نتیجے میں ایس ایچ او سمیت چار پولیس اہلکار شہید ہوگئے۔

پولیس کے مطابق تھانہ پنیالہ کے گاؤں وانڈہ بڈھ میں سرچ آپریشن کیلئے جانے والی پولیس پارٹی پر پہلے سے چھپے ہوئے دہشتگردوں نے اچانک فائرنگ کردی۔

واقعے میں ایس ایچ او تھانہ پنیالہ فہیم ممتاز مروت، کانسٹیبل عرفان خان، کانسٹیبل غلام سبحانی اور کانسٹیبل وجاہت علی شہید ہوگئے۔

دہشت گرد حملے میں ڈی ایس پی حافظ محمد عدنان سمیت چار اہلکار زخمی ہوئے۔

زخمیوں کو ٹراما سینٹر منتقل کر دیا گیا جہاں تمام زخمیوں کی حالت خطرے سے باہر ہے جبکہ  واقعے کے بعد علاقے کو محاصرے میں لے کر آپریشن کیا جارہا ہے۔

دوسری جانب وزیراعلیٰ خیبر پختونخوا سہیل آفریدی نے ڈی آئی خان میں پولیس پر فائرنگ کے واقعے کا نوٹس لے لیا اور کہاکہ دہشت گردوں کے حملے میں شہید ایس ایچ او سمیت اہلکاروں کی قربانی کو سلام پیش کرتے ہیں اور شہید پولیس اہلکاروں کے لواحقین کے غم میں برابر کےشریک ہیں۔

انہوں نے کہا کہ صوبائی حکومت متاثرہ خاندانوں کو ہر ممکن معاونت فراہم کرے گی، خیبر پختونخوا پولیس دہشت گردی کے خلاف فرنٹ لائن پر ہے، دہشت گردی کے بزدلانہ حملوں سے پولیس کے حوصلے پست نہیں کیے جا سکتے۔