حکمران خون کو بنیاد بنا کر جمہوریت کو معطل کرنا چاہتے ہیں،حماد اظہر

پاکستان تحریک انصاف رہنما حماد اظہر نے کہا ہے کہ ہماری آج کی ریلی میں عوام کثیر تعداد میں شریک ہو گی، کیسے ہوسکتا ہے کہ 30 اپریل کو الیکشن ہیں اور آپ جلسے منسوخ کر رہے ہیں۔ حماد اظہر نے میڈیا سے گفتگو کرتے ہوئےکہا کہ عمران خان پر 77 مقدمات بنائے جا چکے ہیں، رانا ثناء لاشیں اور خون چاہتا ہے، یہ خون کو بنیاد بنا کر جمہوریت کو معطل کرنا چاہتے ہیں۔

حماد اظہر کا کہنا تھا کہ ہم نےقانون و آئین کو ہاتھ میں نہیں لیا، کارکنوں سے اپیل ہے پرامن رہیں، ریلی کچھ ہی دیر میں شروع ہونے والی تھی، زمان پارک آنے والے راستے بند کیےجا رہے ہیں، ہمارے کارکنوں کی پکڑ دھکڑ کی جا رہی ہے۔

انہوں نے کہا کہ کیا آج کنٹینر لگانے سے عمران خان غیر مقبول ہو جائیں گے، پر امن ریلی روکنےکیلئےشہر میں جلسے،جلوس پرپابندی عائد کردی گئی، نگراں وزیراعلیٰ جمہوری عمل کو منجمد کر رہےہیں۔حماد اظہر نے کہا کہ الیکشن سے پہلے انسانی بنیادی حقوق پامال کرنا مناسب نہیں، نگراں وزیراعلیٰ کا کام صرف الیکشن کرانا ہے۔