پی ڈی ایم کی حکومت الیکشن سے بری طرح خوفزدہ ہے،چوہدری پرویز الہیٰ

پاکستان تحریک انصاف کے صدر چوہدری پرویز الہیٰ سے سابق صوبائی وزیر راجہ بشارت، سیاسی رہنما چوہدری نعیم الدین وڑائچ، چوہدری وسیم الدین وڑائچ اور چوہدری اعجاز احمد وڑائچ کی ملاقات ہوئی۔

 پرویزالہیٰ نے کہا کہ لاہور میں 8 مارچ کو زمان پارک میں نگران وزیر اعلیٰ نے سانحہ ماڈل ٹاؤن کی خونی تاریخ دہرائی ہے، اس خونریزی کا حساب نگران وزیر اعلیٰ کو ہر صورت میں دینا پڑے گا۔انہوں نے کہا کہ رانا ثناء اللہ سانحہ ماڈل ٹائون،سانحہ 25 مئی اور سانحہ زمان پارک میں براہ راست ملوث ہیں،وفاقی وزیر داخلہ بہت جلد قانون کے شکنجے میں ہوں گےاور اپنے انجام کو پہنچیں گے۔

سابق وزیر اعلیٰ نےکہا کہ آئینی طور پر کوئی ادارہ الیکشن میں تعاون سے انکار نہیں کر سکتا، کوئی سرکاری ادارہ الیکشن میں تعاون سے انکار کرے گا تو ذمہ دار براہ راست وزیراعظم شہبازشریف ہوں گے۔سپریم کورٹ کے حکم پر پنجاب میں الیکشن کی تاریخ کا اعلان ہو چکا ہے، شہبازشریف اگر سپریم کورٹ کے حکم پر عملدرآمد میں رکاوٹ بنیں گے تو یوسف رضا گیلانی کی طرح گھر جائیں گے۔

انہوں نے کہا کہ الیکشن کی تاریخ کے اعلان کے بعد پنجاب میں انشاء اللہ عمران خان کی حکومت دوبارہ قائم ہونے میں اب کوئی رکاوٹ باقی نہیں رہی۔ ملکی تاریخ میں یہ پی ڈی ایم کی حکومت پہلی حکومت ہے جو الیکشن سے بری طرح خوفزدہ ہے۔ پی ڈی ایم الیکشن سے فرار کے حیلے بہانے کر کے عملی طور پر اپنی شکست تسلیم کر چکی ہے۔