صدرعارف علویٰ نے آرمی ایکٹ ترمیمی بل اور آفیشل ایکٹ ترمیمی بل پر دستخط کر دیے 

اسلام آباد: صدرعارف علویٰ نے آفیشل ایکٹ ترمیمی بل اور آرمی ایکٹ ترمیمی بل پردستخط کر دیے جس کے بعد دونوں بل قانون کی شکل اختیار کر گئے ہیں۔ 

یاد رہے کہ جب یہ بل پیش کیا گیا تو اپوزیشن اورحکومتی اراکین اس کے خلاف تھے جس کی وجہ سے یہ بل قائمہ کمیٹی کے سپرد کر دیا گیا تھا۔ 

بعد ازاں سینیٹ میں آفیشل سیکریٹ ترمیمی بل اور آرمی ایکٹ سے کچھ متنازع شقیں نکال کر دوبارہ پیش کیا گیا جسے پہلے قومی اسمبلی اور پھر سینیٹ نے منظور کر کے دستخط کے لیے سمری صدر پاکستان کو ارسال کر دی تھی۔

آفیشل سیکریٹ ایکٹ

آفیشل سیکریٹ ترمیمی بل کے مطابق کوئی شخص جو جان بوجھ کر امن عامہ کا مسئلہ پیدا کرتا ہے، ریاست کے خلاف کام کرتا ہے، ممنوعہ جگہ پر حملہ کرتا یا نقصان پہنچاتا ہے جس کا مقصد براہ راست یا بالواسطہ دشمن کو فائدہ پہنچانا ہے تو وہ جرم کا مرتکب ہوگا، خلاف قرزی کی صورت میں 3 سال قید، 10 لاکھ روپے جرمانہ یا دونوں سزائیں ہوں گی۔

آرمی ایکٹ

آرمی ایکٹ کے مطابق کوئی بھی فوجی اہلکار ریٹائرمنٹ، استعفے یا برطرفی کے دو سال بعد تک سیاسی سرگرمی میں حصہ نہیں لے گا جبکہ حساس ڈیوٹی پر تعینات فوجی اہلکار یا افسر ملازمت ختم ہونے کے 5 سال تک سیاسی سرگرمی میں حصہ نہیں لے گا۔

آرمی ایکٹ سیکشن 26 اے میں ایک نئے سیکشن کا اضافہ کیا گیا ہے جس کے مطابق سرکاری حیثیت میں حاصل شدہ معلومات جو پاکستان اور افواج کی سکیورٹی اور مفاد سے متعلق ہو افشا کرے گا اسے پانچ سال قید بامشقت تک کی سزا ہو سکے گی، البتہ آرمی چیف یا بااختیار افسر کی جانب سے منظوری کے بعد غیر مجاز معلومات دینے پر سزا نہیں ہو گی، راز افشا کرنے والے شخص کو آرمی ایکٹ اور  آفیشل سیکریٹ ایکٹ کے تحت نمٹا جائے گا۔