حکومت کا ریکوڈک منصوبے میں اپنے حصص سعودی عرب کو فروخت کرنے پرغور

حکومت نے سعودی سرمایہ کاروں کو راغب کرنے اور معاشی تعاون کو فروغ دینے کے لیے ریکوڈک منصوبے میں اپنے حصص سعودی عرب کو فروخت کرنے غور شروع کر دیا ہے، دوسری طرف سعودی عرب نے ریکوڈک منصوبے میں حصہ لینے میں گہری دلچسپی ظاہر کی ہے۔

خصوصی سرمایہ کاری کونسل (ایس آئی ایف سی) نے ان ممکنہ لین دین کو آسان بنانے کے لیے پہل کی ہے اور وفاقی ایجنسیوں پر زور دیا ہے کہ وہ آئندہ مہینوں میں سعودی کمپنیوں کے ساتھ بات چیت کو تیز کریں۔

رپورٹس کے مطابق پاکستان کی تجویز میں ریکوڈک پراجیکٹ میں خاص طور پر سعودی عرب کی جانب سے معدنیات کی تلاش کے لیے ایک وقف شدہ بلاک مختص کرنا شامل ہے۔ تاہم، سعودی دلچسپی کسی نامعلوم علاقے میں کان کنی کی سرگرمیاں شروع کرنے کے بجائے موجودہ منصوبے میں سرمایہ کاری میں مضمر ہے۔