کھیلوں کے سامان کی برآمدات میں سالانہ بنیادوں پرکمی

اسلام آباد: ملک سے کھیلوں کے سامان کی برآمدات میں جاری مالی سال کے دوران سالانہ بنیادوں پرکمی ریکارڈکی گئی ہے۔

پاکستان بیوروبرائے شماریات کی جانب سے اس حوالہ سے جاری کردہ اعدادوشمارکے مطابق جولائی اوراگست میں کھیلوں کے سامان کی برآمدات سے ملک کو67.52 ملین ڈالرکازرمبادلہ حاصل ہوا جو گزشتہ مالی سال کی اسی مدت کے مقابلہ میں 11 فیصدکم ہے، گزشتہ مالی سال کی اسی مدت میں کھیلوں کے سامان کی برآمدات سے ملک کو74.86 ملین ڈالر کا زرمبادلہ حاصل ہواتھا، اگست میں کھیلوں کے سامان کی برآمدات کاحجم 30.10 ملین ڈالرریکارڈکیاگیا۔

جوجولائی میں 37.42 ملین ڈالراورگزشتہ سال اگست میں 39.94 ملین ڈالرتھا،مالی سال 2023 میں کھیلوں کے سامان کی برآمدات سے ملک کو460.62 ملین ڈالرکازرمبادلہ حاصل ہواتھا۔اعدادوشمارکے مطابق جاری مالی سال کے پہلے دوماہ میں فٹ بالز کی برآمدات کاحجم 38.09 ملین ڈالرریکارڈکیاگیا۔

جو گزشتہ مالی سال کی اسی مدت میں 37.48 ملین ڈالرتھا، اسی طرح دستانوں کی برآمدات سے ملک کو11.29 ملین ڈالرکازرمبادلہ حاصل ہواجوگزشتہ مالی سال کی اسی مدت میں 12.82 ملین ڈالرتھا۔کھیلوں کے دیگرسامان کی برآمدات کاحجم 18.13 ملین ڈالرریکارڈکیاگیا جوگزشتہ مالی سال کی اسی مدت میں 24.56 ملین ڈالرتھا۔