شاہ رخ خان کی زندگی کو خطرہ، قتل کی دھمکیاں

ممبئی: بالی ووڈ کے کنگ خان کو ان کی حالیہ فلموں ’جوان‘ اور ’پٹھان‘ کی کامیابی کے بعد جان سے مارنے کی دھمکیاں مل رہی ہیں، جس کے باعث سیکیورٹی بڑھا دی گئی ہے۔

بھارتی میڈیا رپورٹس کے مطابق شاہ رخ نے رواں سال دو سپر ہٹ فلمیں پٹھان اور جوان دیں جس کے بعد نامعلوم افراد مسلسل سپر اسٹار کو جان سے مارنے کے دھمکی آمیز پیغامات بھیج رہے ہیں۔

مہاراشٹر حکومت نے شاہ رخ خان کو Y+ زمرہ کی سیکورٹی فراہم کی ہے۔

رپورٹس کے مطابق مہاراشٹر کی ویری امپورٹنٹ پرسن (وی آئی پی) سیکیورٹی یونٹ ہر وقت شاہ رخ کے ساتھ رہے گا۔ اس سیکورٹی یونٹ میں چھ ذاتی سیکورٹی افسران اور پانچ مسلح گارڈز شامل ہیں۔

اس کے علاوہ ممبئی میں شاہ رخ خان کی رہائش گاہ ’منت‘ کی سیکیورٹی بھی بڑھا دی گئی ہے۔ ممبئی پولیس کے چار اہلکار اداکار کے گھر پر 24 گھنٹے پہرے میں رہیں گے۔

اس سے قبل شاہ رخ کے ساتھ دو مسلح گارڈز بھی تھے۔ شاہ رخ کے علاوہ اداکار سلمان خان کو بھی وائی پلس سیکیورٹی فراہم کی گئی ہے۔

خیال رہے کہ یہ سال شاہ رخ خان کے لیے بہت خوش قسمت ثابت ہوا۔ چند ماہ قبل ریلیز ہونے والی یش راج فلمز کی پٹھان نے پوری دنیا میں کامیابی سے بزنس کیا ہے اور مجموعی طور پر 10.5 ارب روپے کا بزنس کیا ہے جب کہ فلم جوان اب تک پوری دنیا میں 10.9 ارب روپے کا بزنس کر چکی ہے۔ دنیا