اسرائیل نے غزہ پر بمباری تیز کردی، شہید فلسطینیوں کی تعداد 113 ہو گئی

تفصیلات کے مطابق عید کی رات غزہ پر ہونے والی اسرائیلی بمباری میں فلسطینی خاتون اور اس کے تین بچے شہید ہوئے ، غزہ پر عید کے روز اسرائیلی بمباری سے 580 فلسطینی شہری زخمی ہوئے۔ اسرائیل کے اندر اسرائیلی شہریوں اور فلسطینیوں کے درمیان بھی جھڑپیں اور ہاتھاپائی شروع ہوگئی ۔ اسرائیل نے غزہ بارڈر پر ٹینک اور ہزاروں فوجی تعینات کردیئے،  اسرائیل کی فوج نے غزہ میں زمینی دستے بھیج کر حملہ کرنے کے اپنے ہی بیان کو دو گھنٹے بعد واپس لے لیا۔ اسرائیلی فوج نے بھی غزہ میں زمینی آپریشن کےآغاز کی تردید کردی۔ الجزیرہ رپورٹ کے مطابق غزہ باڈر پر ٹینک اور آرٹلری موجود لیکن ابھی زمینی حملے کی تیاری مکمل نہیں ہے ۔

 اسرائیلی فوج نے بھاری ہتھیاروں سے رہائشی عمارتوں کو نشانہ بنایا، بلڈنگز ملبے کا ڈھیر بن گئیں، ہزاروں لوگ بے گھر ہوگئے۔ غزہ کے شمال مشرقی علاقوں میں اسرائیلی حملوں کے پیش نظر شہریوں نے نقل مکانی شروع کردی۔ 

 غزہ سے اسرائیل پر سیکڑوں راکٹ برسائے گئے، جنوبی لبنان سے بھی اسرائیل کے اندر تین راکٹ حملے کیے گئے ۔ امریکا نے اسرائیلی حملوں کیخلاف آج ہونیوالا سلامتی کونسل کااجلاس رکوا دیا۔ امریکی وزیر خارجہ کا کہنا ہے کہ معاملے کو سفارتکاری کے ذریعے حل کرنا چاہتے ہیں، فلسطین اسرائیل تنازع پر سلامتی کونسل کااجلاس اگلے ہفتے ہوگا۔

دوسری جانب اقوام متحدہ کے سیکرٹری جنرل نے اسرائیل کی جانب سے رہائشی علاقوں پر حملے پر اظہار تشویش کیا ہے۔ ایمنسٹی انٹرنیشنل نے اسرائیل سے غیر قانونی طاقت کا استعمال فوری روکنے کا مطالبہ کیا ہے۔ عرب لیگ کے سربراہ نے غزہ پراسرائیلی حملے کی مذمت کی ہے۔عرب لیگ  نے اسرائیل کو غزہ میں "بلا اشتعال اور غیر ذمہ دارانہ" حملوں کاذمہ دارٹھہرایا۔