برطانیہ میں کورونا وائرس کی بھارتی قسم کا پھیلاؤ تیز ہونے لگا

تفصیلات کے مطابق  پبلک ہیلتھ آف انگلینڈ کاکہنا ہے کہ   برطانیہ میں کورونا وائرس  کی بھارتی قسم  کے کیسز میں 152فیصد اضافہ دیکھنے میں آیا ہے اور متاثرین کی  مجموعی تعداد1ہزار313ہوگئی ہے ۔  غیر ملکی خبر رساں ایجنسی کے مطابق کورونا وائرس کی بھارتی قسم کے پھیلاؤ کے پیش نظر بلیک برن میں آئندہ ہفتے سے 18 سال سے زائد عمر کے افراد کو کورونا ویکسین لگانے کا فیصلہ کیا گیا ہے۔نوجوانوں کو ویکسین لگانے کا فیصلہ ہنگامی بنیادوں پر کیا گیا ہے کیونکہ کورونا کی بھارتی قسم کے پھیلاؤ کاشدید  خدشہ ہے ۔

برطانوی وزیراعظم بورس جانسن  کا کہنا ہے  کہ " ہم اس کے بارے میں  فکرمند ہیں کیونکہ یہ پھیلتا ہی جارہا ہے ،" انہوں نے مزید کہا کہ جمعرات کو اس پر  مزید بات کی جائے گی ۔ شمال مغربی انگلینڈ میں مختلف نوعیت کے کیسز  میں اضافے کے  پیش نظر   گھر گھر جاکر ٹیسٹنگ  کی گئی ہے ، جب کہ ویکسینیشن کی اضافی سہولیات  کا سلسلہ بھی شروع کیا  جارہا ہے ۔

یاد  رہے کہ لنکا شائر میں کورونا کی بھارتی قسم تیزی سے پھیلنے کے پیش نظر  نیشنل ہیلتھ سروس نے ملک بھر میں 40 سال یا اُس سے زائد عمر کے لوگوں کو کورونا ویکسین لگانے کا سلسلہ شروع کر دیا تھا۔رپورٹ کے مطابق کورونا کی بھارتی قسم کا پھیلاؤ روکنے کے لیے لنکا شائر کو ہنگامی طور پر اضافی ویکسین دی گئی ہے۔

واضح رہے کہ برطانیہ میں  کورونا  متاثرین کی تعداد 44 لاکھ سے تجاوز کرچکی ہے ، جبکہ مہلک وائرس 1لاکھ 29ہزار سے زائد افراد کی جان لے چکا ہے ۔