غزہ : اسرائیلی فورسز کی وحشیانہ بمباری، 33فلسطینی شہید

عرب میڈیا  کے مطابق  غزہ میں اسرائیلی فورسز کی وحشیانہ بمباری کا سلسلہ نہ تھم سکا، اسرائیلی فورسز کی تازہ کاروائی میں 33فلسطینی شہید ہوگئے ہیں  جبکہ  درجنوں زخمی  ہیں۔

عرب میڈیا کے مطابق  غزہ میں اسرائیلی فورسز کے حملوں میں شہید ہونیوالے فلسطینیوں کی مجموعی تعداد181  ہوگئی ہے، شہیدہونیوالوں میں 74بچے بھی شامل ہیں۔

فلسطین کی صورتحال پر او آئی سی کا اجلاس جاری ہے جبکہ  اقوام متحدہ کی سکیورٹی کونسل  کا بھی  اجلاس آج ہوگا۔

فلسطین کی تازہ ترین صورتحال پر بلائے گئے او آئی سی کے اجلاس سے ورچوئل خطاب کرتے ہوئے وزیر خارجہ شاہ محمود قریشی کا کہنا تھا کہ اسرائیلی فوج نہتے فلسطینیوں کے خلاف جارحیت کر  رہی ہے ، اسرائیلی فوج کا نہتےفلسطینیوں پر ظلم انسانی حقوق کی خلاف ورزی ہے۔

وزیر خارجہ شاہ محمود قریشی کا کہنا تھا کہ غزہ پر اسرائیلی بمباری سے بے گناہ فلسطینی شہید ہو رہے ہیں۔

شاہ محمود قریشی کا کہنا تھا کہ فلسطینیوں پر  اسرائیلی جارحیت روکنے کے لیے ہر ممکن قدم اٹھایا جائے اور عالمی برادری فلسطینیوں کے خلاف طاقت کا غیر قانونی استعمال رکوائے، غزہ پر بمباری فوری طور پر ر کوائی جائے۔

ان کا کہنا تھا کہ پاکستان فلسطینیوں کے حق خود ارادیت کی حمایت کرتا ہے، پاکستان فلسطین کے دو ریاستی حل کی حمایت کرتاہے، او آئی سی اسرائیلی جارحیت رکوانے کے لیے ہر ممکن قدم اٹھائے۔

دوسری جانب عیسائیوں کے مذہبی پیشوا پوپ فرانسیس نے اسرائیل اور غزہ  کے درمیان جھڑپیں بندکرنے کا مطالبہ کردیا ہے۔پوپ فرانسیس کا کہنا ہے کہ  حالیہ دنوں میں بچوں سمیت معصوم شہریوں  کی موت ناقابلِ قبول ہے۔