عراقی حکومت کی ملک میں امریکی اڈے پر ڈرون حملے کی مذمت

بغداد: عراقی حکومت نے عراق کے شمالی نیم خودمختارعلاقے کردستان میں اربیل ہوائی اڈے کے قریب امریکا کی زیر قیادت اتحادی افواج کے ایک ایئربیس پر ڈرون کے حملے کی مذمت کی ہے۔

شنہوا کے مطا بق عراقی وزیراعظم کے فوجی ترجمان یحییٰ رسول نے ایک بیان میں کہا کہ حملہ سول اربیل ایئرپورٹ کے قریب ہوا جس میں متعدد افراد زخمی ہوئے اور ایئرپورٹ کا آپریشن متاثر ہوا۔بیان کے مطابق حملے کو دہشت گردی کی کارروائی قرار دیتے ہوئے کہا گیا ہے کہ اس طرح کی مجرمانہ کارروائیوں کا مقصد عراق کے مفادات کو نقصان پہنچانا ہے۔

واضح رہے کہ عراق میں اسلامی مزاحمت نامی ایک مسلح گروپ نے اس حملے کی ذمہ داری قبول کی ہے۔