جنوبی کوریا کے اپوزیشن لیڈر کو سرعام گردن میں چھرا گھونپ دیا گیا

جنوبی کوریا کی اپوزیشن ڈیموکریٹک پارٹی کے رہنما لی جائی میونگ کو منگل کو جنوبی شہر بوسان کے دورے کے دوران گردن میں چھرا گھونپ کر زخمی کر دیا گیا، انہیں علاج کے لیے یونیورسٹی کے اسپتال منتقل کر دیا گیا۔ حکام کے مطابق خون زیادہ نکل جانے کا خطرہ ہے لیکن زخم جان لیوا نہیں ہے۔

لی جے میونگ بوسان کے ایک مجوزہ ہوائی اڈے کے دورے پر تھے، اس کے بعد پریس کانفرنس کے دوران ایک نامعلوم شخص نے ان کی گردن کے بائیں جانب چاقو سے حملہ کیا۔ حملہ آور میونگ سے آٹو گراف لینے کے بہانے ان کے قریب پہنچ گیا تھا اور اچانک چھلانگ لگائی اور میونگ کی گردن پر بائیں جانب چھرا گھونپ دیا۔ یونہاپ کے مطابق حملہ آور کو موقع پر ہی گرفتار کر لیا گیا۔

 پولیس کا کہنا ہے کہ میونگ کو "گردن پر ایک سینٹی میٹر کا زخم آیا ہے۔ لی میونگ اپوزیشن ڈیموکریٹک پارٹی کے سربراہ ہیں اور 2022 کے صدارتی انتخابات میں قوم پرست رہنما یون سے بہت معمولی فرق سے ہار گئے تھے۔ یہ واقعہ ایسے وقت پیش آیا ہے جب جنوبی کوریا کے پارلیمانی انتخابات چند ماہ بعد ہونے والے ہیں۔ امید ہے کہ ملک میں اپریل میں عام انتخابات ہوں گے۔

جنوبی کوریا کے صدر کے دفتر کی طرف سے جاری ایک بیان میں کہا گیا ہے کہ صدر یون سک یول نے واقعے کی فوری تحقیقات کا حکم دے دیا ہے اور میونگ کو اپنی مکمل حمایت کی پیش کش کی ہے۔ بیان میں کہا گیا ہے، یون نے اس بات پرزور دیا کہ ہمارے معاشرے میں کسی بھی حالت میں اس قسم کے تشدد کو برداشت نہیں کیا جائے گا۔