عوام پر ایک بار پھر بجلی بم گرا دیا گیا

مہنگائی کی چکی میں پسی عوام پر ایک بار پھر بجلی بم گرا دیا گیا،

ایک ماہ کیلئے بجلی کی فی یونٹ قیمت میں 4 روپے 12 پیسے کا اضافہ کردیا گیا۔ بجلی کی قیمتوں میں اضافہ نومبر کے فیول پرائس ایڈجسٹمنٹ کی مد میں کیا گیا۔

نیپرا اتھارٹی نے قیمتوں میں اضافے کا نوٹیفکیشن جاری کردیا۔ بتایا گیا ہے کہ سی پی پی اے نے فیول پرائس کی مد میں 4 روپے 66 پیسے کا اضافہ مانگا تھا۔ جس پر نیپرا اتھارٹی نے گزشتہ ہفتے سماعت کے بعد فیصلہ محفوظ کیا تھا۔ 

بجلی کی قیمتوں میں حالیہ اضافے کے اطلاق کے الیکٹرک صارفین پر نہیں ہوگا۔ حالیہ اضافے میں فیول پرائس اور بقایا جات کی مد میں وصولیاں شامل ہیں۔ اس حوالے سے نوٹیفکیشن جاری کردیاگیا ہے۔

نوٹیفکیشن کے مطابق  موجودہ اضافہ بجلی صارفین سے جنوری کے بلوں میں وصول کیا جائے گا۔ قیمتوں میں اضافے سے صارفین پر 35 ارب سے زائد کا بوجھ پڑے گا۔