بنگلہ دیش میں عام انتخابات ،اپوزیشن جماعت کا بائیکاٹ

بنگلہ دیش میں عام انتخابات کا آغاز ہوگیا ہے تاہم سابق وزیر اعظم خالدہ ضیا کی قیادت میں اپوزیشن جماعت بنگلہ دیش نیشنلسٹ پارٹی (بی این پی)نے انتخابات کا بائیکاٹ کیا ہے۔

غیر ملکی خبر رساں ایجنسی کے مطابق بنگلہ دیش کی وزیر اعظم شیخ حسینہ نے ڈھاکہ کے سٹی کالج میں اپنا ووٹ ڈالنے کے بعد میڈیا سے گفتگو کرتے ہوئےکہا کہ حکومت اس بات کو یقینی بنانا چاہتی ہے کہ ملک میں جمہوریت برقرار رہے مستحکم جمہوریت کی عدم موجودگی میں کوئی ملک ترقی نہیں کر سکتا۔

انہوں نے امید ظاہر کی کہ لوگ بڑی تعداد میں ان کی پارٹی عوامی لیگ کو ووٹ دیں گے، انتخابات کے بائیکاٹ پر اپوزیشن جماعت بنگلہ دیش نیشنلسٹ پارٹی (بی این پی) پر تنقید کرتے ہوئے کہا کہ بی این پی جمہوریت پر یقین نہیں رکھتی اسی لیے انہوں نے انتخابی عمل کو متاثر کرنے کے لیے تشدد کا سہارا لیا ہے۔

بنگلادیش کے عام انتخابات کے ابتدائی نتائج کا اعلان کل صبح تک ہونے کا امکان ہے اور اپوزیشن کے بائیکاٹ کے باعث ایک بار پھر شیخ حسینہ واجد کے وزیراعظم بننے کا امکان ہے۔شیخ حسینہ کا کہنا ہے کہ  انتخابات کا بائیکاٹ کرنے والی مرکزی جماعت ایک "دہشت گرد تنظیم" ہے، اس بات کو یقینی بنانے کی کوشش کر رہے ہیں کہ ملک جمہوری رہے۔ بنگلا دیش ایک خودمختار ملک ہے، لوگ میری طاقت ہیں اور ہماری جماعت عوامی مینڈیٹ حاصل کرے گی۔

دوسری جانب بی این پی نے کل سے ملک بھر میں 2 روز کی ہڑتال کی کال بھی دے رکھی ہے جبکہ الیکشن سے پہلے پُرتشدد واقعات بھی سامنے آئے اور اس دوران 5 اسکولوں اور 4 پولنگ بوتھز کو جلا دیاگیا۔ چٹاگانگ میں پولیس اور اپوزیشن ارکان کے درمیان جھڑپیں بھی دیکھنے میں آئیں، اپوزیشن کارکنان نے ٹائر جلا کرسڑک بلاک کر رکھی تھی، اپوزیشن کو منتشر کرنے کیلئے پولیس کی جانب سے شاٹ گن سے فائرنگ کی گئی۔

انہوں نے مزید کہا کہ بنگلہ دیش کے عوام نے انہیں مسترد کر دیا ہے ۔واضح رہے کہ بی این پی نے ووٹروں سے انتخابات کا بائیکاٹ کرنے اور ملک بھر میں دو روزہ ہڑتال کی کال دی ہے