چوہدری پرویز الہٰی کے کاغذات نامزدگی مسترد ہونے کیخلاف اپیل پر فیصلہ محفوظ

الیکشن ٹریبونل نے پی ٹی آئی کے مرکزی صدر اور  سابق وزیراعلیٰ پنجاب چوہدری پرویز الہٰی کے کاغذات نامزدگی مسترد کرنے کیخلاف اپیل پر فیصلہ محفوظ کر لیا۔ الیکشن ٹریبونل کے جج جسٹس چوہدری عبدالعزیز نے پرویز الہٰی کی اپیل پر سماعت کی۔

الیکشن کمیشن کی جانب سے لاء افسر فلک شیر اور اسسٹنٹ ڈائریکٹر لاء ذوالقرنین حیدر جبکہ پرویز الہٰی کی جانب سے سردار عبدالرازق ایڈووکیٹ عدالت میں پیش ہوئے۔

الیکشن کمیشن نے سابق وزیراعلیٰ چوہدری پرویز الہٰی کے کاغذات نامزدگی کے حوالے سے ریکارڈ عدالت میں پیش کر دیا جبکہ وکیل مرکزی صدر پی ٹی آئی سردار عبدالرازق ایڈووکیٹ نے دلائل مکمل کر لئے۔

الیکشن ٹریبونل نے دلائل مکمل ہونے پر چوہدری پرویز الہٰی کے کاغذات نامزدگی مسترد ہونے کے خلاف اپیل پر فیصلہ محفوظ کر لیا۔

واضح رہے کہ سابق وزیراعلیٰ پنجاب نے این اے 59 اور پی پی 23 سے کاغذات نامزدگی جمع کروائے تھے جنہیں ریٹرننگ افسر نے مسترد کر دیا، پرویز الہٰی نے آر او کے فیصلے کو الیکشن ٹریبونل میں چیلنج کیا تھا۔