چوہدری پرویز الہی اور ان کی اہلیہ کے کاغذات نامزدگی مسترد کرنے کا فیصلہ برقرار

الیکشن ٹریبونل نے سابق وزیراعلیٰ پنجاب چوہدری پرویز الہٰی اور ان کی اہلیہ کے کاغذات نامزدگی مسترد کر دیئے۔مرکزی صدر پی ٹی آئی  نے این اے 59 اور اہلیہ قیصرہ الہٰی نے پی پی 23 سے کاغذات نامزدگی جمع کروائے تھے۔

الیکشن ٹریبونل کے جج جسٹس چوہدری عبدالعزیز نے محفوظ فیصلہ سنایا، الیکشن ٹریبونل نے ریٹرننگ افسر کا فیصلہ برقرار رکھتے ہوئے چوہدری پرویز الہٰی اور ان کی اہلیہ قیصرہ الہیٰ کے کاغذات نامزدگی مسترد کر دیئے۔

قبل ازیں دوران سماعت الیکشن کمیشن کی جانب سے لاء افسر فلک شیر اور اسسٹنٹ ڈائریکٹر لاء ذوالقرنین حیدر جبکہ پرویز الہٰی کی جانب سے سردار عبدالرازق ایڈووکیٹ عدالت میں پیش ہوئے۔

الیکشن کمیشن نے سابق وزیراعلیٰ چوہدری پرویز الہٰی کے کاغذات نامزدگی کے حوالے سے ریکارڈ عدالت میں پیش کر دیا جبکہ وکیل مرکزی صدر پی ٹی آئی سردار عبدالرازق ایڈووکیٹ نے دلائل مکمل کر لئے۔

الیکشن ٹریبونل نے دلائل مکمل ہونے پر چوہدری پرویز الہٰی کے کاغذات نامزدگی مسترد ہونے کے خلاف اپیل پر فیصلہ محفوظ کیا تھا۔

واضع رہے کہ آر او آفس نے چوہدری پرویز الہی کے کاغذات نامزدگی درست نہ ہونے اور بیان خلفی منسلک نہ کرنے کا اعتراض لگایا تھا، اس کے علاوہ شوگر مل او اسلحہ کے لائسنس فراہم نہ کرنے کا بھی اعتراض عائد کیا گیا تھا۔