سعودی عرب میں چار روزہ حج و عمرہ خدمات کانفرنس اور نمائش کا آغاز ہو گیا

جدہ: شاہ سلمان بن عبدالعزیز آل سعود کی زیر سرپرستی سعودی وزارت حج و عمرہ کے زیر اہتمام چار روزہ حج و عمرہ خدمات کانفرنس اور نمائش 2024 پیر کو جدہ میں شروع ہو گئی۔ جدہ کے معروف سپرڈوم میں جس میں 35,000 نشستوں کی گنجائش موجود ہے ایک رنگا رنگ افتتاحی تقریب کا انعقاد کیا گیا، تقریب میں دنیا بھر کے مختلف ملکوں سے وزراء، سفیروں، قونصلرز اور حج اور عمرہ کے شعبے میں کام کرنے والی نجی اور سرکاری کمپنیوں کے 200 سے زائد اداروں نے شرکت کی۔

پاکستان کے وزیر برائے مذہبی امور اور بین المذاہب ہم آہنگی انیق احمد اور وزیر اعظم کے معاون خصوصی حافظ طاہر محمود اشرفی بھی حج و عمرہ کانفرنس کے افتتاحی اجلاس میں موجود تھے۔سعودی وزیر حج و عمرہ ڈاکٹر توفیق الربیعہ نے اپنے افتتاحی خطاب میں سالانہ کانفرنس اور نمائش کے اغراض و مقاصد پر روشنی ڈالی۔ تجارتی پہلوؤں اور حج اور عمرہ کے بڑھتے ہوئے اخراجات کے بارے میں بات کرتے ہوئے انہوں نے حج اور عمرہ زائرین کو بہترین سہولیات کی فراہمی کو یقینی بنانے کے لیے مملکت کے عزم کا اعادہ کیا۔ سعودی حکام کے درمیان حج اور عمرہ کے امور میں تعاون بڑھانے کے لیے دو معاہدوں پر دستخط کے علاوہ کانفرنس اور نمائش کی کچھ اسپانسر کمپنیوں کو بھی افتتاحی سیشن کے دوران انعامات سے بھی نوازا گیا۔

مختلف سیشنز کے ساتھ ساتھ، چار روزہ کانفرنس کے دوران مختلف موضوعات پر سیمینارز، ورکشاپس اور پینل مباحثوں کا انعقاد بھی کیا جائے گا، جس میں دنیا بھر کے میڈیا اداروں کے درمیان موثر تعاون اور شراکت داری کے ذریعے سالانہ حج کے مناسک کو بھرپور انداز میں پیش کرنے میں میڈیا کا اہم کردار شامل ہے۔حج اور عمرہ سروسز کانفرنس اور نمائش ایک سالانہ تقریب ہے جو ممتاز مفکرین، اختراع کاروں، محققین اور کاروباری افراد کو متحد کرتی ہے، جو تمام حجاج کی خدمات کو بہتر بنانے کے لیے کوشاں ہیں۔یہ تقریب متنوع عرب اور اسلامی کمیونٹیز کے ساتھ علاقائی اور بین الاقوامی بات چیت کو فروغ دینے کے لیے ایک اہم پلیٹ فارم ہے۔