فری لانسرز کیلئے 10 ہزار ای روزگارسینٹرز کے قیام کا فیصلہ

اسلام آباد: فری لانسرز کی سہولت کے لیے وزارت انفارمیشن ٹیکنالوجی نے 10 ہزار ای روزگارسینٹرز کے قیام کا فیصلہ کیا ہے۔

وزارت انفارمیشن ٹیکنالوجی نے فری لانسرز کی سہولت کے لیے 10 ہزار ای روزگارسینٹرز کے قیام کا فیصلہ کیا ہے جس کا اعلان اسلام آباد میں ’’ٹیک ڈیسٹینیشن‘‘ کے عنوان سے میگا ایونٹ میں ہوگا۔

نگراں وفاقی وزیر برائے انفارمیشن ٹیکنالوجی ڈاکٹر عمر سیف کہتے ہیں کہ پاکستان میں 15 لاکھ فری لانسرز باقاعدہ کام کررہے ہیں، ان فری لانسرز میں سے بیشتر کو مطلوبہ سہولیات میسر نہیں ہیں۔

ڈاکٹر عمر سیف کا کہنا ہے کہ تمام سہولیات سے آراستہ ہر ای روزگار مرکز میں 100 لوگوں کے کام کی گنجائش ہوگی اور ہر مرکز میں 100 ورکنگ اسٹیشن یعنی 10 لاکھ فری لانسرز کے لیے سہولت ہوگی۔ یہ 10 لاکھ فری لانسرز سالانہ 10 ارب ڈالرز قیمتی زرمبادلہ کماسکیں گے۔

انہوں نے کہا کہ نگراں حکومت میں وزارت آئی ٹی و ٹیلی کمیونیکیشن کے کامیاب ترین 4 ماہ رہے۔