ہم سے بلا چھین کر پچ اکھاڑ دی گئی لیکن میدان نہیں چھوڑیں گے، بابر اعوان

تحریک انصاف کے رہنما بابر اعون نے کہا ہے کہ الیکشن کمیشن نے جو انتخابی نشان رکھے ہیں وہ آرٹیکل 14 کی خلاف ورزی ہے، کسی جگہ بینگن ہے تو کسی جگہ جوتا۔ کوئی معزز انتخابی نشان بھی دیا جا سکتا تھا۔جو لوگ اپنی عوام کی نمائندگی کرنے کےلئے آ رہے ہیں ان کو کس قسم کے نشانات الاٹ کئے جا رہے ہیں۔

اسلام آباد ہائیکورٹ میں میڈیا سے گفتگو کرتے ہوئے بابر اعوان نے کہا کہ پچ اکھاڑ دی گئی ہے اور وکٹ اٹھا کر لوگ بھاگ گئے ہیں۔ بلا ہم سے چھین لیا گیا لیکن میدان میں رہے گئے اور الیکشن میں بھرپور حصہ لیں گے۔ پاکستان کی سب سے بڑی سیاسی جماعت آئین اور قانون کی وجہ سے نہیں بلکہ تکنیکی وجوہات پر انتخابی نشان سے محروم ہوئی۔ 

رہنما پی ٹی آئی کا کہنا تھا کہ بلی چوہے کا کھیل پورے پاکستان میں چل رہا ہے، آنے والی پارلیمنٹ دو مہینے بھی نہیں چل سکتی، زبردستی کے بٹھائے ہوئے لوگوں کو عوام قبول نہیں کریں گے۔ پی ٹی آئی کسی صورت الیکشن کا بائیکاٹ نہیں کرے گی، نوازشریف پہلے بھی دو چیفس سے لڑائی کرکے جا چکے ہیں، نوازشریف کو لانے سے کوئی استحکام نہیں آئے گا۔