وزیراعلی پنجاب نے آج لاہورمیں ارفع ٹیچرچیٹ بوٹ کاافتتاح کردیا

لاہور: پنجاب کے نگران وزیر اعلیٰ محسن نقوی نے آج لاہور کے ارفع سوفٹ ویئر ٹیکنالوجی پارک میں ارفع ٹیچر چیٹ بوٹ کا افتتاح کیا۔

انہوں نے ارفع کریم ٹیکنالوجی انکیوبیٹر کا بھی دورہ کیا اور انفارمیشن ٹیکنالوجی کے فروغ کیلئے ارفع کریم فائونڈیشن کی کوششوں کو سراہا۔

محسن نقوی نے اِس موقع پر کہا کہ ارفع ٹیچر CHAT BOT ملک کے مثبت تشخص کو اجاگر کرنے میں مددگار ثابت ہو گا، انہوں نے کہا کہ ارفع ٹیچر CHAT BOT کا مکمل ورژن ایک شاندار تعلیمی آلہ ہے جو دُور دراز علاقوں کے رہنے والوں کو تعلیم مہیا کرے گا۔

دریں اثنا پنجاب کے نگران وزیراعلیٰ محسن نقوی نے آج لاہور میں لاہور بورڈ موبائل ایپ۔ ای سروس کا اجراء بھی کیا۔

صحافیوں سے گفتگو کرتے ہوئے نگران وزیراعلیٰ پنجاب نے توقع ظاہر کی کہ پنجاب کے دوسرے بورڈز کو بھی جلد آن لائن خدمات فراہم کی جائیں گی۔

انہوں نے عام لوگوں کی سہولت کیلئے بہتر سافٹ ویئر تیار کرنے کیلئے پنجاب انفارمیشن ٹیکنالوجی بورڈ کی کوششوں کو سراہا۔