تحریک عدم اعتماد لانا اپوزیشن کا حق ہے: اسدقیصر

تفصیلات کے مطابق ا سپیکر قومی اسمبلی اسد قیصر  نے پارلیمنٹ ہاؤس میں پریس کانفرنس کرتے ہوئے کہا کہ قومی اسمبلی میں رونما ہونے والے واقعات قابلِ افسوس ہیں ۔انہوں نے کہا کہ یہ واقعات جمہوریت کے لیے نیک شگون نہیں، کوشش ہے کہ قواعد کے مطابق اجلاس چلے، ایک دوسرے کو سنا جائے۔ ان کاکہنا تھا کہ بجٹ  میں بہتری پر فیصلہ عوام  نے کرنا ہے   ،  اپوزیشن اور حکومت کو میز پر بٹھانے کے لیے کوشاں ہوں، فریقین پارلیمنٹ کے تقدس کا خیال رکھیں۔

 انہوں نے کہا  کہ میں جانبدار نہیں ہوں ، سب کو برابر کا موقع دیتا ہوں۔  ارکان کے خلاف جو کارروائی کی اس پر بھی اعتراض کیا گیا۔ اسد قیصر  نے کہا کہ میرے پاس صرف اخلاقی طاقت ہے،  ہاؤس چلانے کےلیے کسی کو اٹھا کر ایوان سے باہر تو نہیں پھینک سکتا، اپوزیشن کو اس کی تعداد کے مطابق وقت دیا ،  سات اراکین کو ویڈیوز دیکھ کر معطل کیا  ہے اور میری کسی کے ساتھ ذاتی دشمنی یا عناد نہیں  ، یہ اقدام ایوان کے تقدس کے لیے اٹھایا ۔

اسدقیصر کا کہنا تھا کہ میں نے ان چیزوں پر ایکشن لیا جب میں خود اجلاس چلا رہا تھا، کل میں نے وزیرِ اعظم عمران خان سے ملاقات کی، جس کے بعد میں نے شہباز شریف اور بلاول بھٹو زرداری سے بھی بات کی۔ اسپیکر قومی اسمبلی نے  کہاکہ میں اس وقت بھی اپوزیشن رہنماؤں سے رابطے میں ہوں،  چاہتا ہوں کہ سب لوگ مل کر رولز کے ساتھ ایوان کو چلائیں۔

 انہوں نے کہا کہ میرا استعفیٰ اپوزیشن کی خواہش ہے، جبکہ ایوان نے مجھے ہاؤس چلانے کا مینڈیٹ دیا ہے، میں اپنے مینڈیٹ کے مطابق اپنا کام کرتا رہوں گا۔