تنقید ہوتی رہتی ہے ، تنقید کو کبھی منفی اندا ز میں نہیں لیا : کرکٹر آصف علی

رپورٹ : انس سعید

تفصیلات کے مطابق اسلام آباد یونائیٹڈ کے کھلاڑی کرکٹر آصف علی کا کہنا ہے کہ مشکل ٹائم میں پی ایس ایل کا ملتوی ہو کر دوبارہ شروع ہونا خوش آئند ہے پوائنٹس ٹیبل پر سر فہرست ہونے سے ڈریسنگ روم کا ماحول بہت اچھا ہے ہمارا کمبی نیشن اچھا بن گیا ہے۔ ٹاپ آرڈر اور مڈل آرڈر اپنا حصہ ڈال رہا ۔ بولنگ بھی سب کے سامنے ہے افتخار احمد کے ساتھ اچھی شراکت داری بنی، پلان یہی تھا کہ اس کو لمبا لے کر چلنا تمام کھلاڑی بہت محنت کر رہے ہیں، اپنے فینز کو مایوس نہیں کریں گے۔

 آصف علی نے بتایا کہ آسٹریلوی کھلاڑی عثمان خواجہ پہلی بار پی ایس ایل کھیلنے آئے ہیں، بہت کچھ سیکھنے کو مل رہا ہے عثمان خواجہ کا رویہ بہت اچھا ہے، لگ نہیں رہا غیر ملکی کھلاڑی ہیں ایسا لگتا ہے وہ بھی مقامی کھلاڑیوں میں سے ہی ہیں  ۔

قومی کرکٹر آصف علی نے کہا کہ ان کو  جہاں بھی موقع ملتا ہے وہاں میں نے خود کو منوایا ہے۔ انٹر نیشنل اور ڈومیسٹک میں بہت فرق ہے ۔ انٹر نیشنل میں صرف چار پانچ اوورز ملتے ہیں لیکن ڈومیسٹک میں زیادہ اوورز اور لمبا کھیلنے کا موقع ملتا  ہے ۔

دائیں ہاتھ کے بیٹسمین آصف علی کا کہنا ہے کہ تنقید ہوتی رہتی ہے ۔ تنقید کو کبھی منفی اندا ز میں نہیں لیا جس سے پیار ہو اس پر تنقید ہوتی ہے لیکن تنقید سے متحرک ہو جاتا ہوں کہ اچھا کرنا ہے تاکہ لوگ تعریف کریں، سوشل میڈیا پر دھیان نہیں دیتا ، میں کسی کو سنتا ہوں نہ پڑھتا ہوں ۔ کبھی کسی سے ناراض نہیں ہوتا ، بس یہی ہوتا ہے کہ کسی کو بات کرنے کا موقع نہیں دینا ۔

آئی سی سی ٹی ٹونٹی ورلڈ کپ میں شرکت کے حوالے سے بیٹسمین آصف علی نے کہا کہ جو پاکستان کے لیے بہتر کر سکتا ہو اس کو پاکستان ٹیم میں کھیلنا چاہیے  مجھے ، افتخار احمد ، خوشدل شاہ کو موقع ملا  لیکن ہم پرفارم نہیں کر سکے  نئے لڑکوں کے لیے نیک خواہشات ہیں۔