چہلم امام حسینؓ: پنجاب کے کئی شہروں میں موبائل سروس معطل کرنے کا فیصلہ

لاہور : چہلم امام حسینؑ کے موقع پر امن و امان کی صورتحال کو یقینی بنانے کے لیے پنجاب حکومت نے 10 اضلاع میں موبائل سروس جزوی طور پر معطل کرنے کا فیصلہ کرلیا ہے۔

محکمہ داخلہ پنجاب کے ترجمان کے مطابق موبائل سروس صرف ان علاقوں میں معطل کی جائے گی جہاں جلوس اور مجالس منعقد ہوں گی۔ یہ پابندی صبح 5 بجے سے رات 11 بجے تک نافذ رہے گی۔

راولپنڈی، جھنگ، لیہ، سرگودھا، بھکر، میانوالی، گجرات، گوجرانوالہ، چکوال اور ٹوبہ ٹیک سنگھ میں موبائل سروس معطل کی جائے گی ۔

لاہور سمیت صوبے کے دیگر تمام اضلاع میں موبائل فون سروس معمول کے مطابق جاری رہے گی۔

محکمہ داخلہ پنجاب کا کہنا ہے کہ یہ فیصلہ پولیس کی درخواست پر کیا گیا ہے اور اس کا مقصد امن و امان کو برقرار رکھنا اور شہریوں کی حفاظت کرنا ہے۔ محکمہ داخلہ نے اس سلسلے میں وفاقی حکومت کو بھی ایک مراسلہ لکھ دیا ہے۔