وٹامن سی سے بھرپورکینو کے چھلکے بھی فائدہ مند،مگر کیسے ؟

کینو یا مالٹے کا ذائقہ  بچوں ،بڑوں سبھی کے دلوں کو خوب بھاتا ہے اسی لیے تو یہ  ہر سال  سرد موسم میں سب سے زیادہ فروخت ہونے والا پھل ہے ۔ وٹامن سی سے بھرپور یہ پھل  کیلوریز میں کم مگر غذائی اجزاء سے بھرپور ہوتا ہے جبکہ اس میں موجود وٹامنز اسے بہترین پھل بناتا ہے۔  ماہرین کا کہنا ہے کہکینو آپ کو متعدد بیماریوں سے محفوظ رکھتا ہے لیکن صرف کینو ہی نہیں ، اس کے چھلکے میں بھی بےشمار فوائد موجود ہیں جنہیں جاننے کے بعدآپ اس پھل کے چھلکوں کو کبھی نہیں پھینکیں گے بلکہ سنبھال کررکھیں گے ۔

کینو کے چھلکوں سے آپ مختلف فوائد حاصل کرسکتے ہیں ،اس پھل کے چھلکوں میں بھی فائبر، وٹامن بی 6، کیلشیم، وٹامن اے، فولک ایسڈ سمیت مختلف ایسے اجزاء موجود ہوتے ہیں جوامراض قلب  اور نظام انہضام کو درست رکھنے کیلئے  بے حد مفید ہیں۔ کینو کے  چھلکے میں  موجود پولی فینول کی موجودگی دائمی صحت میں اہم  کردار ادا کرتے ہیں ۔

کینو کے چھلکوں کو کیسے  استعمال کیا جاسکتا ہے ؟

ماہرین صحت کے مطابق کینو کے چھلکوں کوچھوٹے چھوٹے  ٹکڑوں یا  باریک  سلاد میں  استعمال کیا جا سکتا ہے ، آپ  ان کو اسموتھی (جوس ) کے طور پر بھی غذا میں شامل کر سکتے ہیں۔کینو کے چھلکوں کو میٹھے میں زیادہ استعمال کیا جاتا ہے جس میں دہی، مفن یا کیک ، جیم شامل ہیں ۔

کینو کے چھلکوں کے دیگر استعمال کی بات کریں تو ان  چھلکوں  کو باریک  کاٹ کر خشک کریں اور اسے چائے میں استعمال کریں ، یہ چائے بھی وٹامن سی سے بھرپور ہوگی ۔ اگر آپ کپڑوں سے بدبو دور کرنا چاہتے ہیں تو کینو کے چھلکوں کو خشک کرنے کے بعد  الماری میں رکھ دیں، آپ کو کپڑوں  سے خوشگوار مہک کا احساس ہوگا ۔ کینو کے چھلکوں کو اُبال کر نہانے کےپانی میں شامل کرنے سے نہ صرف جسم سے خوشبو آئے گی   بلکہ آپ کی جلد بھی تازہ رہے گی۔ کینو کے  خشک چھلکے دانتوں کی صحت  کیلئے بھی مفید ہیں ۔ چہرے کو تروتازہ رکھنے کیلئے کینو کے چھلکوں کا پاوڈر اگر دودھ میں برابر مقدار میں ملاکر اسکا پیسٹ لگایا جائے تو اس پیسٹ کا ماسک چہرے کیلئے فائدہ مند ہے۔