9مئی: کلمہ چوک کینٹینر جلانے کے مقدمے میں پی ٹی آئی کے 8 روپوش رہنما اشتہاری قرار

انسداد دہشتگردی عدالت(اے ٹی سی) لاہورنے نو مئی کو کلمہ چوک پر کینٹینر جلانے کے مقدمے میں پاکستان تحریک انصاف(پی ٹی آئی) کے  8 روپوش رہنماؤں کو اشتہاری قرار دے دیا۔

اے ٹی سی نے تھانہ نصیر آباد میں درج مقدمے میں پولیس کی درخواست پر کارروائی کی۔ 

دوران سماعت پولیس نے عدالت کو بتایا کہ ملزمان گرفتاری کے ڈر سے روپوش ہو چکے ہیں، ان کے وارنٹ گرفتاری بھی جاری ہوئے مگر وہ گرفتار نہ ہو سکے۔

جس پرانسداد دہشت گردی عدالت نے پی ٹی آئی رہنما میاں اسلم اقبال، حماد اظہر، مراد سعید، زبیر خان نیازی، حامد رضا گیلانی، محمد جاوید، عبد الصمد اور واثق قیوم کو اشتہاری قرار دے دیا۔

عدالت نے پی ٹی آئی رہنماؤں کے دائمی وارنٹ گرفتاری بھی جاری کر دیئے۔