ایرانی سر زمین پر حملے عالمی قوانین اور سلامتی کونسل کی قراردادوں کی خلاف ورزی ہے،روس

ماسکو: روس نےایرانی جوہری تنصیبات پر امریکی فضائی اور میزائل حملوں کی شدید الفاظ میں مذمت کرتے ہوئے کہا ہے کہ یہ حملے عالمی قوانین، یو این چارٹر اور سلامتی کونسل کی قراردادوں کی خلاف ورزی ہے۔

تفصیلات کے مطابق روسی وزارت خارجہ نے ایران پر امریکی حملوں کے بعد جاری بیان میں کہا کہ اسرائیل کے حالیہ حملوں کے بعد ایران کی جوہری تنصیبات پر امریکا کے حملوں کی سختی سے مذمت کرتے ہیں۔

روسی وزارت خارجہ کی جانب سے جاری کردہ بیان میں مزید کہا گیا کہ ایک خودمختار ریاست کی سرزمین پر میزائل اور فضائی حملے، پیش کردہ جواز سے قطع نظر بین الاقوامی قانون، اقوام متحدہ کے چارٹر اور اقوام متحدہ کی سلامتی کونسل کی متعلقہ قراردادوں کی کھلم کھلا خلاف ورزی ہے۔

روسی وزارت خارجہ نے کہا ہے کہ حالات کو سیاسی اور سفارتی راستے پر واپس لانے کی کوششیں بڑھائی جائیں۔

بیان میں مزید کہا گیا کہ اقوام متحدہ نے مسلسل اور واضح طور پر ایسے اقدامات کو ناقابل قبول قرار دیا ہے، خاص طور پر اس حقیقت سے متعلق ہے کہ یہ حملے اقوام متحدہ کی سلامتی کونسل کے ایک مستقل رکن نے کیے تھے۔

وزرات خارجہ نے بیان میں کہا کہ اقوام متحدہ کی سلامتی کونسل کو بھی سخت مؤقف اختیار کرنا چاہیے، امریکا اور اسرائیل کے تصادم اور عدم استحکام کے اقدامات کو اجتماعی طور پر مسترد کیا جانا چاہیے۔

روس نے بیان میں کہا کہ ہم جارحیت کے فوری خاتمے اور حالات کو پرامن سفارتی راستے پر لانے کے لیے کوششیں تیز کرنے کا مطالبہ کرتے ہیں۔