روس کا یوکرین پر ڈرونز اور میزائلوں سے بڑا فضائی حملہ،ایک یوکرینی ایف 16 طیارہ تباہ

ماسکو: روس نے یوکرین کے خلاف گزشتہ شب کارروائی کرتے ہوئے ڈرونز اور میزائلوں سے اب تک کا سب سے بڑا فضائی حملہ کیا جسے روکنے کے دوران ایک یوکرینی ایف 16 طیارہ بھی تباہ ہوا۔ 
امریکی میڈیا نے یوکرینی فوج کا حوالہ دیتے ہوئے بتایا کہ روسی حملے میں 537 ڈرونز اور میزائلوں کا استعمال کیا گیا  جن میں سے 249 ڈرونز اور میزائلوں کو گرادیا گیا جبکہ دیگر ریڈار سے غائب ہوگئے۔
یوکرینی فوج کے مطابق روسی حملے میں متعدد شہروں کو نشانہ بنایا گیا جس کے نتیجے میں سول انفرااسٹرکچر کو نقصان پہنچا اور متعدد افراد زخمی ہوئے۔
یوکرین کا ایک ایف 16 لڑاکا طیارہ روسی حملوں سے دفاع کرتے ہوئے گر کر تباہ ہو گیا جس کے نتیجے میں ایک پائلٹ ہلاک ہو گیا۔

یوکرینی فضائیہ کے بیان میں کہا گیا ہے کہ لیفٹیننٹ کرنل پائلٹ نے اپنے متاثرہ طیارے کو رہائشی علاقوں سے دور لے جانے کی ہر ممکن کوشش کی لیکن وہ بروقت باہر نکلنے میں ناکام رہے۔
 یوکرینی فوج کا کہنا ہے کہ پائلٹ نے روسی حملے کے دوران 7 فضائی اہداف کو کامیابی سے نشانہ بنایا تاہم آخری ہدف کا نشانہ بنانے کے دوران طیارہ تباہ ہوا۔
 غیر ملکی خبررساں ایجنسی کے مطابق یوکرین نے گزشتہ سال امریکی ساختہ ایف 16 طیاروں کا استعمال کیا تھا جن میں سے اب تک 3 طیارے تباہ ہوچکے ہیں۔ یہ بات واضح نہیں ہے کہ یوکرین کے پاس اس وقت کل کتنے ایف 16 طیارے موجود ہیں۔