ایل پی جی 7 روپے 43 پیسے فی کلو سستی، نئی قیمت یکم جولائی سے نافذ

ایران اور اسرائیل کے درمیان کشیدگی میں کمی کے بعد، آئل اینڈ گیس ریگولیٹری اتھارٹی (اوگرا) نے مائع پیٹرولیم گیس (ایل پی جی) کی قیمت میں 7 روپے 43 پیسے فی کلو کمی کر دی ہے۔

اوگرا کی جانب سے جاری کردہ نوٹیفکیشن کے مطابق، ایل پی جی کی نئی قیمت 233 روپے 10 پیسے فی کلو مقرر کی گئی ہے۔

نوٹیفکیشن میں یہ بھی بتایا گیا ہے کہ 11.8 کلو گرام کے گھریلو سلنڈر کی قیمت میں 87 روپے 71 پیسے کی کمی کی گئی ہے، جس کے بعد اس کی نئی قیمت 2 ہزار 751 روپے ہو گئی ہے۔

یہ نئی قیمتیں یکم جولائی سے نافذ العمل ہوں گی۔