پاکستان کو پہلا گولڈ میڈل دلانے والے پہلوان دین محمد 100 برس کی عمر میں انتقال کر گئے

پاکستان کے لیے پہلا ایشیائی گولڈ میڈل جیتنے والے نامور ریسلر دین محمد انتقال کر گئے۔ ان کی عمر 100 برس سے زائد تھی۔

دین محمد پہلوان نے 1954 کے ایشین گیمز، منیلا میں پاکستان کی نمائندگی کرتے ہوئے گولڈ میڈل حاصل کیا۔ لاہور کے نواحی علاقے باٹا پور سے تعلق رکھنے والے دین محمد نے فلپائن، بھارت اور جاپان کے پہلوانوں کو شکست دے کر ملک کا پرچم بلند کیا۔

ایشین گیمز کے علاوہ انہوں نے دیگر بین الاقوامی مقابلوں میں بھی پاکستان کی نمائندگی کی اور کامن ویلتھ گیمز میں برونز میڈل جیتا، جس سے ان کا شمار پاکستان کے ابتدائی سپورٹس ہیروز میں ہوتا ہے۔

ریسلر دین محمد کے انتقال پر صوبائی وزیر کھیل ملک فیصل ایوب کھوکھر اور ڈی جی اسپورٹس پنجاب خضر افضال چوہدری نے گہرے رنج و غم کا اظہار کیا ہے۔

وزیر کھیل نے اپنے تعزیتی بیان میں کہا کہ دین محمد پہلوان کی خدمات قومی کھیل کے لیے ناقابلِ فراموش ہیں، جنہوں نے ریسلنگ کے میدان میں پاکستان کا نام عالمی سطح پر روشن کیا۔