وزیراعظم شہباز شریف اقتصادی تعاون تنظیم اجلاس میں شرکت کے لیے آذربائیجان پہنچ گئے

وزیراعظم شہباز شریف دو روزہ دورے پر آذربائیجان پہنچ گئے، جہاں وہ اقتصادی تعاون تنظیم (ECO) کے سربراہی اجلاس میں شرکت کریں گے۔

وزیراعظم آذربائیجان کے شہر شوشا، کاراباخ پہنچے، جہاں فذولی ایئرپورٹ پر ان کا پرتپاک استقبال کیا گیا۔ آذربائیجان کے وزیر ثقافت عادل کرملی، آذربائیجان میں پاکستان کے سفیر خضر فرہادوف، پاکستان کے آذربائیجان میں سفیر قاسم محی الدین اور دیگر اعلیٰ سفارتی و حکومتی شخصیات نے ان کا خیرمقدم کیا۔

وزیراعظم شہباز شریف اقتصادی تعاون تنظیم کے سربراہی اجلاس سے خطاب کریں گے، جبکہ اس موقع پر وہ مختلف عالمی رہنماؤں سے اہم ملاقاتیں بھی کریں گے۔

وزیراعظم کے ہمراہ نائب وزیراعظم اسحاق ڈار، وفاقی وزیر اطلاعات عطا اللہ تارڑ اور معاون خصوصی برائے امور خارجہ طارق فاطمی بھی وفد میں شامل ہیں۔