بھارتی ٹیم کا دورہ بنگلا دیش ملتوی، سیریز اب ستمبر 2026 میں ہوگی: بی سی سی آئی

بھارتی کرکٹ بورڈ (بی سی سی آئی) نے بھارتی ٹیم کا مجوزہ دورۂ بنگلا دیش ری شیڈول کرتے ہوئے رواں سال ٹیم کو بنگلا دیش نہ بھیجنے کا فیصلہ کیا ہے۔

بی سی سی آئی نے اس فیصلے کی تصدیق ایک اعلامیے کے ذریعے کی، جس میں بتایا گیا کہ بنگلا دیش کرکٹ بورڈ (بی سی بی) کے ساتھ مشاورت کے بعد دورہ ملتوی کیا گیا ہے۔ اب یہ سیریز ستمبر 2026 میں کھیلی جائے گی۔

بی سی سی آئی کے مطابق یہ فیصلہ دونوں ٹیموں کی بین الاقوامی مصروفیات اور شیڈولنگ میں آسانی کو مدنظر رکھتے ہوئے کیا گیا ہے۔

اعلامیے میں مزید کہا گیا ہے کہ سیریز کے نئے شیڈول کا باضابطہ اعلان مناسب وقت پر کیا جائے گا۔

واضح رہے کہ بھارتی ٹیم نے اگست 2025 میں بنگلا دیش کا دورہ کرنا تھا، جہاں تین ون ڈے اور تین ٹی ٹوئنٹی میچز پر مشتمل وائٹ بال سیریز شیڈول تھی۔