صدر زرداری کو ہٹانے کی افواہیں بے بنیاد ہیں ، سب ایک پیج پر ہیں: محسن نقوی

وفاقی وزیرِ داخلہ محسن نقوی نے صدرِ مملکت آصف علی زرداری کو ہٹانے سے متعلق افواہوں کو بے بنیاد قرار دیتے ہوئے کہا ہے کہ سوشل میڈیا پر پھیلائی جانے والی ایسی باتوں پر کان نہ دھرا جائے۔ انہوں نے واضح کیا کہ "کچھ لوگوں کو اس بات پر تکلیف ہے کہ پہلی بار حکومت، سیاست دان اور ملٹری اسٹیبلشمنٹ سب ایک پیج پر ہیں۔"

روہڑی میں میڈیا سے گفتگو کرتے ہوئے محسن نقوی سے صحافی نے سوال کیا کہ آیا صدر زرداری کو ان کے عہدے سے ہٹایا جا رہا ہے؟ اس پر وزیر داخلہ نے دو ٹوک جواب دیا "دو دن مزید سیاست نہ کریں، اور سوشل میڈیا کی افواہوں پر دھیان نہ دیں۔

انہوں نے مزید کہا کہ سوشل میڈیا پر بے بنیاد باتوں کو ہوا دی جا رہی ہے کیونکہ بعض عناصر اس اتحاد سے خوش نہیں ہیں۔
"لوگوں کو تکلیف ہے کہ ہم سب اکٹھے ہیں، اس لیے افواہیں پھیلائی جاتی ہیں۔ میری درخواست ہے کہ کچھ دن سیاسی بیانات سے گریز کیا جائے۔

امن و امان سے متعلق بات کرتے ہوئے وفاقی وزیر نے کہا کہ جس طرح خیبرپختونخوا میں دہشت گردوں کو پسپا کیا گیا، اسی طرز پر کچے کے علاقے میں ڈاکوؤں کے خلاف بھی وفاق اور صوبے مل کر فیصلہ کن کارروائی کریں گے۔

محسن نقوی نے فرقہ وارانہ اور مذہبی منافرت پر زیرو ٹالرنس کی پالیسی پر زور دیتے ہوئے کہا کہ سوشل میڈیا پر اشتعال انگیزی کو ہرگز برداشت نہیں کیا جائے گا۔
"ملک میں امن و امان کی بحالی اولین ترجیح ہے، اور فتنۂ الہند کے عزائم کو ناکام بنانے کے لیے سیکیورٹی ادارے مکمل چوکنا ہیں۔"

انہوں نے بتایا کہ ملک بھر میں محرم الحرام کے جلوس پُرامن طریقے سے جاری ہیں، جن کی تعداد 27 ہزار سے زائد ہے۔ سکھر میں 9 محرم کا مرکزی جلوس انتہائی منظم انداز میں نکالا گیا، جس میں تقریباً 10 لاکھ افراد شریک ہوئے۔

جلوسوں کی مانیٹرنگ کے لیے مرکزی کنٹرول روم کے ساتھ ساتھ صوبائی سطح پر بھی کنٹرول رومز فعال کر دیے گئے ہیں، تاکہ عاشورہ کے دوران امن و امان کو یقینی بنایا جا سکے۔